काठमाडौं – अब नयाँ शुरूआतसहित सबैको प्रतिबद्ध भिजनका साथ अगाडि बढ्नुपर्ने आवश्यकता औंल्याउँदै पारस खड्काले नेपाली क्रिकेट टीमको कप्तानी छाडेका छन् ।

सामाजिक सञ्जाल फेसबूकमा मंगलवार स्टाटस लेख्दै पारसले कप्तान पदबाट राजनीनामा दिएको घोषणा गरेका हुन् । पारसले नेपाल क्रिकेट संघ क्यानमाथि लागेको प्रतिबन्ध हटेकोमा खुशी समेत व्यक्त गरेका छन् ।

आईसीसीले नेपाल क्रिकेट संघ क्यानमाथि लामो समयदेखि लगाएको प्रतिबन्ध सोमवार फुकुवा भएको थियो । त्यसको एक दिनपछि पारसले राजीनामा दिएको घोषणा गरेका हुन् ।

यद्यपि पारसले खेलाडीका रूपमा भने नेपाली टोलीमा निरन्तरता दिएका छन् । खेलाडीका रूपमा भने उनलाई मैदानमा देख्न पाइने छ ।

के लेखे पारसले ? 

नेपाल क्रिकेट संघको प्रतिबन्ध हटाइएको कुरा थाहा पाउँदा निकै खुशी लागेको छ ।

नयाँ कमिटीलाई नेपाली क्रिकेट, खेलाडीहरू र सरोकारवालाहरूको भलाइका लागि नयाँ कमिटीले काम गर्न सकोस् भन्ने कामना गर्छु ।

यससँगै म कप्तानको पदबाट राजीनामा दिन्छु । अब नयाँ शुरूआतसहित तथा सबैको प्रतिबद्ध भिजनका साथ कुराहरूलाई अगाडि बढाउनुपर्नेछ । 

म सबै खेलाडी, प्रशिक्षक, अम्पायर, ग्राउन्डस्मेन, साथीहरू र मेरो परिवारलाई यस अविश्वसनीय यात्रामा सहयोग गरेकोमा धन्यवाद दिन चाहन्छु । अर्को समयसम्मका लागि बाईबाई ।