जनकपुरधाम – जनकपुर विमानस्थलमा तोडफोड गरेको आरोपमा पक्राउ परेका सांसद प्रमोद साहलाई धनुषा ल्याइएको छ ।

प्रहरीको विशेष टोलीले मंगलवार त्रिभुवन अन्तर्राष्ट्रिय विमानस्थलबाट पक्राउ गरेका साहलाई अपराह्न जनकपुर ल्याइएको जिल्ला प्रहरी कार्यालय धनुषाका एसपी शेखर खनालले जानकारी दिए ।

साहलाई जनकपुर ल्याउनुअघिबाटै विमानस्थलमा कडा सुरक्षा व्यवस्था गरिएको थियो । दर्जनौं प्रहरी परिचालन भएका थिए ।

साह पक्राउको विरोधमा राजपाका कार्यकर्ताले विमानस्थल परिसर र त्यसबाहिर प्रदर्शन समेत गरेका थिए । राजपा नेपाल धनुषाको अध्यक्ष मण्डलको बैठक नै बसेर पक्राउको विरोध गर्ने निर्णय गरेको थियो ।

साहको पक्राउप्रति उनकी श्रीमती समेत रहेकी प्रदेशसभा सांसद निरा साहले आपत्ति जनाएकी छन् ।

विमान ढिला हुँदा बिरामी छट्पटाइरहेको अवस्थामा व्यक्त आक्रोशलाई लिएर पक्राउ गर्नु अन्यय भएको उनको गुनासो छ ।

सोमवार बिहान साढे ११ बजे उड्नुपर्ने बुद्ध एयरको विमान २ बजेसम्म पनि नउडेको भन्दै सांसद साहले विमानस्थलको भीआईपी कक्षमा तोडफोड गरेका थिए ।

साहविरुद्ध जनकपुर नागरिक उड्डयन कार्यालयका तर्फबाट विमानस्थल प्रमुख सन्तोष ढकालले प्रहरीमा जाहेरी दिएका थिए ।

पक्राउ परेका सांसद साहलाई जिल्ला प्रहरी कार्यालय धनुषामा राखिएको छ ।

साहमाथि गैरसैनिक हवाई उडान ऐन, २०१५ दफा ९ को (६) बमोजिमको कसूरमा अनुसन्धान हुने एसपी खनालले बताए ।

कसूर ठहरभए ५ देखि १० वर्षसम्मको कैद सजाय हुन सक्ने उनको भनाइ छ ।