हातमा क्यानुला प्रतिक्रया शून्य अनुहार : महरालाई अस्पतालबाट अदालत पुर्‍याउँदा जे देखियो

असोज २९, २०७६

काठमाडौं– घिउ कलरको कमिज, खैरौ पाइन्ट, चस्मा र दायाँतर्फ लर्काइएको कपाल; निवर्तमान सभामुख कृष्णबहादुर महरालाई नर्भिक अस्पतालबाट जिल्ला सरकारी वकिलको कार्यालय तथा जिल्ला अदालत काठमाडौं लैजाँदा देखिएको हुलिया हो यो ।

संसद् सचिवालयमा काम गर्ने एक महिला कर्मचारीमाथि यौन दुव्र्यवहार गरेको आरोपमा पक्राउ परेका महरालाई १०औं दिनको दिन म्याद थपका लागि जिल्ला अदालत काठमाडौंमा पेश गरिएको थियो । महरा असोज १९ गते सभामुखको सरकारी निवास बालुवाटारबाट पक्राउ परेका थिए ।


ADVERTISEMENT

बीचमा दशैंको लामो विदाका कारण अदालतबाट म्याद नै नलिई १० दिनसम्म हिरासतमा राखियो । जिल्ला अदालतले पक्राउ परेको दिनदेखि लागू हुनेगरी १३ दिनको म्याद दियो । महराले थप ३ दिन प्रहरी हिरासतमा बिताउनुपर्ने भयो । अदालतले दिएको म्याद शुक्रवारसम्म रहेको र शनिवार सार्वजनिक बिदा भएकाले हिरासतमा बस्ने दिन ५ दिनसम्म लम्बिन सक्ने सम्भावना पनि छ ।

बिरामी भएपछि नर्भिक अस्पताल भर्ना भएका महरालाई मंगलबार बिहान बयानका लागि जिल्ला सरकारी वकिलको कार्यालय लगिएको थियो । सरकारी वकिलको कार्यालयमा बयान सकेर महरालाई काठमाडौं जिल्ला अदालतमा पेश गरिएको थियो ।

महराका केही तस्वीर सञ्चारकर्मीले झल्याकझुलुक खिच्न भ्याए, तर प्रतिक्रिया लिन भने सम्भव भएन । महरालाई कडा सुरक्षाबीच सुरक्षकर्मीले घेरेर लगेका थिए, त्यसैगरी नर्भिक अस्पताल फिर्ता ल्याए ।

महराको अनुहार प्रतिक्रिया शून्य थियो, न ज्यादै निराश न सामान्य नै । उनको पाखुरामा स्लाइन दिनका लगि लगाइएको 'क्यानुला' समेत देखिएको थियाे ।

महानगरीय प्रहरी वृत्त सिंहदरबारको हिरासतमा रहेका महरा अस्वस्थ बनेपछि प्रहरीको निगरानीमा केही दिनयता नर्भिक अस्पतालमा उपचार भइरहेको छ ।

तस्वीर : रासस

 

असोज २९, २०७६ मा प्रकाशित

प्रतिक्रिया दिनुहोस

ताजा समाचार