काठमाडौं – प्रधानमन्त्री केपी शर्मा ओलीले देशमा केही भयो कि भएन भनेर बूढाबूढीलाई सोध्न आग्रह गरेका छन् ।

दशैंतिहार, छठ तथा नेपाल संवतका अवसरमा नेपाल कम्युनिस्ट पार्टी (नेकपा)ले बुधवार भृकुटीमण्डपमा आयोजना गरेको चियापान कार्यक्रमलाई सम्बोधन गर्दै प्रधानमन्त्री ओलीले देशमा केही भएन भनेर हल्ला चलाउनेहरूप्रति आक्रोश व्यक्त गर्ने क्रममा यस्तो भनेका हुन् ।

'कसैले देशमा केही भएन भनेर हल्ला चलाएका छन्, केहीले केही भिन्नतै भएन भन्छन्,' नेकपाका अध्यक्ष समेत रहेका प्रधानमन्त्री ओलीले भने, 'मैले भन्ने गरेको छु, सम्भ्रान्तलाई केही फरक परेको छैन । जसको घर छ, गाडी छ, छोराछोरी विदेशमा पढ्छन्, तिनीहरूलाई केही फरक परेको छैन ।'

फरक परेको छ कि छैन भनेर बूढाबूढीलाई सोध्दा थाहा हुने जिकिर उनले गरे ।

'बूढाबूढीलाई सोध्नुस् त जीवनमा फरक परेको छ कि छैन ! स्वास्थ्य बिमा छ, फरक परेको छ कि छैन ! हरेक नेपालीको बैंक खाता भनेका छौं, फरक परेको छ कि छैन ! हरेक नेपाली जलविद्युत्को शेयरधनी बन्ने परिस्थिति बनेको छ, फरक परेको छ कि छैन !' प्रधानमन्त्री ओलीले थपे ।

उनले 'समृद्ध नेपाल, सुखी नेपाली'को नारालाई जनताले व्यवहारमै अनुभूत गर्ने गरी मूर्तरूप दिने अभियानमा सरकार रहेको दाबी गरे । 'विकासको बाटो समाउन चाहेका छौं, समातेका छौं, नयाँ गतिका साथ देशलाई अघि बढाएका छौं,' प्रधानमन्त्री ओलीले भने, 'हरेक नेपाली जनतालाई सुखी हुने हक छ, जनतालाई त्यो हक व्यवहारमै दिलाउने अभियानमा छौं ।'

उनले हल्लाको पछि नदौडिन अपिल समेत गरे । 'मानिसहरू नेपाललाई हल्लैहल्लाको देश भन्छन् नि, थियो, अब हल्लाको पनि अर्थ छैन, हल्लाको पछि नदौडिन अपिल गर्दछु,' प्रधानमन्त्री ओलीले भने ।