काठमाडौं – फिलिपिन्सका राष्ट्रपति रोड्रिगो डुटेर्टे मोटरसाइकल दुर्घटनामा परी घाइते भएको उनका वरिष्ठ सहयोगीहरूले जनाएका छन् । उनको नितम्बमा चोट लागेको छ र जिउ कोतरिएको छ । 

बुधवार अबेर राति राष्ट्रपति निवासमा डुटेर्टे घाइते भएको उनका प्रवक्ता साल्भादोर पानेलोले बताए । 

आफूलाई म्यास्थेनिया ग्राभिस नामक रोग लागेको र त्यसको गम्भीर परिणाम आउन सक्ने खुलासा डुटेर्टेले १० दिनअघि मात्र गरेका थिए । 

पानेलोले वक्तव्यमा भने, ‘राष्ट्रपति जुत्ता छुनलाई झुक्दा मोटरसाइकलबाट खस्नुभयो र उहाँलाई हल्का चोट लाग्यो, विशेषगरी कुइनो र घुँडोमा कोतरिएको छ ।’

डुटेर्टेले मोटरसाइकल पार्क गर्न खोज्दा दुर्घटना भएको र अहिले उनी निवासमा आराम गरिरहेको पानेलोले बताए ।

एजेन्सी