काठमाडौं– संसद सचिवालयमा काम गर्ने एक महिला कर्मचारीमाथि यौन दुर्व्यवहार गरेको आरोपमा पक्राउ परेका निवर्तमान सभामुख कृष्णबहादुर महरालाई थप ५ दिन हिरासतमा राख्न अदालतले अनुमति दिएको छ ।

जिल्ला सरकारी वकिलको कार्यालय काठमाडौंमा ६ घण्टाभन्दा लामो बयानपछि महरालाई म्याद थपका लागि आइतवार अपराह्न जिल्ला अदालत काठमाडौंमा पेश गरिएको थियो ।

अदालतले पहिलोपटक दिएको १३ दिनको म्याद शुक्रवार सकिएको थियो । अदालतले आइतवार दिएको नयाँ म्याद शनिवारदेखि नै गणना हुनेछ । 

यौन दुर्व्यवहारको आरोप लागेपछि सभामुख पदबाट राजीनामा दिएका महरा गत असोज १९ गते सभामुखको सरकारी निवास बालुवाटारबाट पक्राउ परेका थिए ।

प्रहरी हिरासतमा रहँदा अस्वस्थ भएपछि महराले प्रहरीकै निगरानीमा नर्भिक अस्पतालमा उपचार गराउँदै आएका छन् ।