काठमाडौं– कालापानीमा भारतले नेपाली भूमि मिचेको विषयमा छलफल गर्न बसेको संसदीय समितिको बैठकमा नेपाली कांग्रेसका दुई सांसदले उत्तरी सीमा (चीनतर्फ) मिचिएकोबारे समेत प्रश्न गरेका छन् । 

प्रतिनिधि सभाअन्तर्गत राज्य व्यवस्था समितिको सोमवार बसेको बैठकमा नेपाली कांग्रेसका सांसद अमरेश कुमार सिंहले उत्तरी सीमा मिचिएको बारेपनि बोल्नु पर्ने बताएका हुन् । 

‘कोराला नाकाको गेटको साँचो चीनले खोल्छ, नेपालसँग किन छैन ? उत्तरतर्फ ११ ठाउँमा सीमा मिचिएकोबारे किन नबोल्ने ?’ सांसद सिंहले प्रश्न गरे । 

नेपाली कांग्रेसकै देवेन्द्रराज कंडेलले दोलखाको ७० नम्बरको पिल्लरलगायत उत्तरतर्फ पनि केही विवाद रहेको भन्दै समाधान गर्नुपर्ने बताए ।

उनले नेपाल–भारत सीमाको दश गजामा भट्टी पसल राख्ने काम बन्द गर्न सरकारको ध्यानाकर्षण गराए । 

सेनाको काम सीमा जोगाउने कि पेट्रोल पम्प खोल्ने ? 

कांग्रेस सांसद सिंहले सीमा सुरक्षामा खटिएका सुरक्षाकर्मीको काम सीमा स्तम्भ जोखाउने भन्दापनि सीमामा कति सामान ल्याए भनेर पैसा उठाउन मै सीमित रहेको बताए । सेनालाई समेत सीमा सुरक्षामा लगाउनु पर्ने भएपनि व्यवसायमा लगाएको भन्दै उनले असन्तुष्टि जनाए । 

‘नेपाली सेना हो या ठ्ेक्कापट्टा सेना ? सेनाको काम देशको भूगोलको रक्षा पहिलो प्राथमिमता हुनुपर्ने हो कि सडक बनाउने, व्यापारिक मल बनाउने या पेट्रोल पम्प चलाउने ?’ उनले प्रश्न गरे ।