काठमाडौं– सामान्य लेनदेनको विषयमा उद्योगी व्यापारीलाई पक्राउ गरेर त्रास फैलाउने काम बन्द गर्न नेपाली कांग्रेसका नेता दीपकुमार उपाध्यायले सरकारको ध्यानाकर्षण गराएका छन् । व्यापारी रुप ज्योतिलाई पक्राउ गरेर सरकारले गलत काम गरेको उनले बताए ।

‘सरकारको कार्यशैलीबाट व्यावसायिक क्षेत्र सन्त्रस्त र आक्रान्त छ,’ उपाध्यायले भने, ‘यो त अति नै भयो ।’ रुप ज्योतिले पैसा तिर्छु भन्दा भन्दै पनि उजुरीको भरमा पक्राउ गरेर प्रहरीले अतिरिक्त सक्रियता देखाएको उपाध्यायको भनाइ छ । 

रुप ज्योति परिवारको केस अहिले अदालमा पुगिसकेको छ । ‘अदालतले आफ्नो ढंगले न्याय निरुपण गर्ला तर उजुरीको भरमा व्यवसायीलाई पक्राउ गर्न प्रहरीले जुन हतारो देखायो, यो घटनाले व्यापारिक घराना सन्त्रस्त देखिन्छन्,’ उपाध्यायले भने ।

हाउजिङका नाममा सर्वसाधरणलाई ठगी गरेको आरोपमा प्रहरीले ज्योति ग्रुपका अध्यक्ष समेत रहेका पूर्व अर्थ सहायक मन्त्री ज्वोतिलाई २१ गते बिहीवार त्रिभुवन विमानस्थलबाट पक्राउ गरेको थियो । ल्याण्डमार्क डेभ्लपर्स हाउजिङको विवादमा रुपज्योतिकी छोरी सुरुचि पनि पक्राउ परेकी छन् । काठमाडौं जिल्ला अदालतले रुप ज्योतिका दाई पद्म ज्योतिलाई पनि पक्राउ पुर्जी जारी गरिसकेको छ । 

भारतका लागि पूर्व नेपाली राजदूत समेत रहिसकेका उपाध्यायले व्यावसायिक वातावरण बनाउनुको सट्टा व्यापारीमाथिको धरपकडले लगानीकर्ता निरुत्साहित हुने चिन्ता व्यक्त गरे ।