प्रदेश नं १ को प्रदेश सभाको आजको बैठक प्रमुख प्रतिपक्षी दल नेपाली कांग्रेसको अवरोधका कारण स्थगन भएको छ ।

यही माघ २३ गतेदेखि शुरू भएको हिउँदे अधिवेशनको दोस्रो बैठक नै स्थगित भएको हो ।

बैठकको प्रारम्भमा नेपाली कांग्रेसका सदस्य उभिएपछि सभामुख प्रदीपकुमार भण्डारीले पटक–पटक बस्न आग्रह गरेका थिए ।

त्यसपछि कांग्रेस संसदीय दलका सचेतक सूर्यमाराज राईलाई बोल्न समय दिँदा उनले लामो संघर्ष र बलिदानबाट प्राप्त संघीयतालाई रक्षा गर्नुपर्ने धारणा राखे । 

उनले अख्तियार दुरुपयोग अनुसन्धान आयोगले एउटै प्रकृतिको मुद्दामा कसैले उन्मुक्ति पाउने र कसैलाई कारवाही हुने गरी गरेको काम गलत भएको आरोप लगाउँदै कारवाही प्रक्रिया नसच्याए लगातार सदन अवरोध गर्ने घोषणा गरे ।

त्यसपछि सभामुख भण्डारीले सोमवार दिउँसो २ बजे बस्ने गरी बैठक स्थगित गरे ।

बैठकको आजको सूचिमा उद्योग, पर्यटन, वन तथा वातावरणमन्त्री जगदीशप्रसाद कुसियतले ‘प्रदेश वातावरण संरक्षण सम्बन्धमा व्यवस्था गर्न बनेको विधेयक’ प्रस्तावस्वरूप सदनमा पेश गर्ने कार्यक्रम तय भएको थियो ।

विरोध सभा

अख्तियार दुरुपयोग अनुसन्धान आयोगले कांग्रेस पार्टीका उपसभापति विजयकुमार गच्छदारलाई कारवाही गर्न गरेको सिफारिसको कांग्रेस विराटनगर महानगरपालिका समितिले विरोध जनाएको छ ।

समितिले विराटनगरको शनिहाटबाट विरोध र्‍याली निकाली स्थानीय हनुमान मन्दिर नजिककै कोण सभाको आयोजना गरेको थियो । रासस