कोरोना भाइरस डिजिज – २०१९ अर्थात् ‘कोविड–१९’को संक्रमण फैलिएपछि चीनको हुबेई प्रान्तस्थित वुहान शहर केही सातादेखि पूर्णरूपमा बन्द छ ।

चीनकै अन्य शहरबाट त्यहाँ जान र त्यहाँका नागरिकलाई अन्यत्र जान समेत प्रतिबन्ध लगाइएको छ । कोरोनाले यो समाचार तयार पार्दासम्म १६ सयभन्दा बढीको ज्यान लिइसकेको छ भने हजारौं प्रभावित छन् ।

कोरोनाको संक्रमण फैलिएपछि नेपाली नागरिकहरू पनि वुहानसहित कोरोनाप्रभावित चिनियाँ शहरमा फसेका थिए ।

आइतवार बिहान उनीहरूलाई नेपाल ल्याइएको छ । 

नेपाल ल्याइएका १ सय ७५  जनालाई भक्तपुरको खरिपाटीस्थित क्वारेन्टाइनमा राखिएको छ । फिर्ता ल्याइएकामध्ये अधिकांश चीनमा अध्ययनरत नेपाली विद्यार्थी छन् ।

आइतवार बिहान त्रिभुवन अन्तर्राष्ट्रिय विमानस्थलमा उत्रिएर खरिपाटी पुर्‍याइएका १७५ नेपालीमध्ये एक हुन्, सौरभ लुइँटेल ।

चिनियाँ राजदूतावासको सहयोगमा सरकारी कोटामा विगत ६ महिनादेखि चीनको वुहानकै ह्वाजोङ् कृषि विश्वविद्यालयमा प्लान्ट प्याथोलोजी (बाली रोग) विषयमा स्नातकोत्तोर अध्ययनरत छन्, सौरभ ।

आइतवार बिहानको सूर्योदय नेपालबाटै नियालेका उनले समाजिक सञ्जाल फेसबूकमा स्टाटस लेखे–

‘हरेक स्वाभिमानी नागरिकको मनको कुरा हो आफू जन्मिएको, नागरिकता लिएको र पासपोर्ट बोकेर हिँडेको मातृभूमि आफ्नो नागरिकहरूप्रति जिम्मेवार भैदियोस् । १०/१५ दिन ढिला भयो, तर सरकार र दूतावासले आफ्नो उपस्थिति जनाएको छ । हामी खुशी छौं देश फर्कन पाएकोमा । देश गरीब होइन र देखाउन पनि पाइँदैन । नागरिकका लागि देश हुनैपर्छ । र अर्को कुरा, भविष्यमा आइपर्ने भैपरी विषम परिस्थिति र आपतकालीन अवस्थाका पूर्वतयारी गर्नुपर्छ, परेपछि होइन । ठीकै छ, नेपाल सरकार, नेपाली राजदूतावास, अभिभावकहरू, मिडिया र हामीलाई माया गर्नेहुने सम्पूर्णप्रति हामी कृतज्ञ छौं । धेरै–धेरै धन्यवाद । जय नेपाल !’

चीनको एयरपोर्टमा नेपालीलाई गरेको स्वागत र नेपालको एयरपोर्टमा गरेको स्वागतले मन गद्गद् भएको सौरभले लोकान्तरसँग बताए ।

‘हामीलाई चीन र नेपालको एयरपोर्टमा तालीले स्वागत गर्दा यति धेरै खुशी भएँ कि मैले शब्दमा व्यक्त गर्न सक्दिनँ,’ सौरभले लोकान्तरसँगको कुराकानीमा भने ।

नेपाल उत्रिएसँगै उनले परिवारसँग पनि फोनमा कुरा गरिसकेका छन् । 
‘बुवा–आमासँग पनि बिहानै कुराकानी भएको थियो, उहाँह  निकै खुशी हुनुहुन्छ,’ सौरभले भने ।

आफूसँग पढ्ने अन्य देशका साथीहरूसँग पनि कुरा भएको बताउँदै उनले उनीहरूलाई स्वदेश लगेर ती देशले गरेको व्यवस्थाभन्दा नेपालमा आफूहरूका लागि गरिएको व्यवस्था राम्रो पाएको उनले सुनाए ।

‘ढिलै भएपनि नेपाल सरकारले राम्रो व्यवस्था गरेको देख्दा भावविह्वल भएको छु । साथीहरूसँग बुझ्दा साउथ एसियामा भारत, पाकिस्तान, बंगलादेशका साथीहरूले भनेको भन्दा हाम्रो धेरै राम्रो लाग्यो,’ सौरभले भने ।

माथिबाट हेर्दा बाहिर नेपाली सेना, नेपाल प्रहरी, डाक्टर  र एम्बुलेन्सहरू देखिएको र भित्र बस्न पनि राम्रो व्यवस्था भएको सौरभले जानकारी दिए ।

खरीपाटी जाँदाजाँदै खाजा दिइयो

भक्तपुरको चाँगुनारायण नगरपालिकास्थित खरीपाटीमा क्वारेन्टाइनमा बस्नेहरूका लागि खानाको पनि राम्रो व्यवस्था गरिएको छ । बिहान विमास्थलबाट खरिपाटी गएका विद्यार्थीलाई आएपछि खाजा दिएको सौरभले बताए ।

‘हामीले बिहान आएपछि खाजा खायौं । अबको केहिबेरमा (११ बजेपछि) खाना खाँदै छौं,’ आइतवार बिहान करीब साढे १० बजे लोकान्तरसँग कुरा गरेका सौरभले भने ।

खाना पाकेपछि छुट्टै ठाउँमा राखिने र आफूहरूले लिएर खाने व्यवस्था भएको सौरभले बताए ।

रगत परीक्षण गरिने

खरीपाटीस्थित विद्युत् प्राधिकरणको तालिम केन्द्रमा राखिएका १ सय ७५ जनाकै आज रगत परीक्षण गरिने भएको छ ।

‘आज रगत परीक्षणका लागि तयार हुन भनिएको छ,’ उनले भने ।