कालापानी जाने भनिएपनि वरैबाट फर्किए रक्षामन्त्री पोखरेल

गोलो घेरामा उपप्रम पोखरेलसहितको टोली, पृष्ठभूमिमा छाङ्गरू र गर्ब्याङ जोड्ने सीतापुल

उपप्रधान एवं रक्षामन्त्री ईश्वर पोखरेलले भारतद्वारा अतिक्रमित नेपाली भूमि कालापानी क्षेत्रको निरीक्षण गर्ने भनिएपनि उनीसहितको टोली कालापानीको आकाशमा समेत प्रवेश नगरी फर्किएको छ ।

उपप्रम पोखरेल, दार्चुलाबाट निर्वाचित सांसद गणेशसिंह ठगुन्नासहितको टोली नेपाली सेनाको हेलिकप्टरमा छाङ्गरूको आकाशसम्म पुगेर फर्किएको हो ।


Advertisement

स्थानीय एक जनप्रतिनिधिका अनुसार छाङ्गरू र कालापानीको दूरी करीब १७ किलोमिटर छ ।

दार्चुला महोत्सव उद्घाटन गर्न आइतवार सदरमुकाम खलंगा पुगेका पोखरेल सोमवार बिहानै नेपाली सेनाको हेलिकप्टरमा भारतसँगको उत्तरपश्चिमी सीमातर्फ लागेका थिए ।


Advertisement

रक्षामन्त्री सहितको टोलीलाई बोकेको हेलिकप्टर छाङ्गरूमा समेत अवतरण गर्न सकेन ।

‘बाक्लो हिउँका कारण हेलिकप्टर अवतरण गर्न नसकेपछि हवाई निरीक्षण गरेर फर्कियौं,’ पोखरेलसँगै निरीक्षणमा गएका सुदूरपश्चिम प्रदेश सभाका सांसद गेल्बुसिंह बोहराले लोकान्तरसँग भने, ‘हामी छाङ्गरू गाउँमा अवतरण गर्न खोजेका थियौं, सम्भव भएन ।’

करीब १० मिनेट त्यस क्षेत्रको हवाई निरीक्षण गरेको उनले जानकारी दिए ।

हवाई निरीक्षण गरेर फर्केका उपप्रम पोखरेलले कालापानी क्षेत्रमा सशस्त्र प्रहरीको (बीओपी) राख्ने कामलाई तीव्रता दिने बताएको सा‌ंसद बोहराको भनाइ छ । 

‘तिंकर नाका जोड्ने सडक जतिसक्दो छिटो बनाउन निर्माणको जिम्मा सेनालाई दिने आश्वासन पनि दिनुभएको छ,’ सांसद बोहराले लोकान्तरसँग भने । 

टोलीमा पोखरेल, ठगुन्ना र बोहराका अलावा प्रदेश उपसभामुख निर्मला बडाल जोशी तथा प्रदेश सांसद मानबहादुर धामी पनि सहभागी थिए ।

नेपाली भू–भाग कालापानी, लिपुलेक, लिम्पियाधुरा लगायतलाई समेटेर भारतले नयाँ नक्सा जारी गरेपछि यो विवाद सतहमा आएको छ ।

यसबीचमा संसद्को राज्य व्यवस्था समितिले लिम्पियाधुरा र लिपुलेकलाई समेटेर नयाँ नक्सा जारी गर्न सरकारलाई निर्देशन समेत दिएको छ ।

तर, सरकारले स‌ंसदीय समितिको निर्देशनबमोजिम नक्सा जारी गरेको छैन ।

शनिवार प्रतिनिधि सभा बैठकलाई सम्बोधन गर्दै प्रधामनन्त्री केपी शर्मा ओलीले नक्सा छाप्ने काम मात्र नभई नेपाली भूमि नै फिर्ता ल्याउने बताएका थिए ।

कालापानी क्षेत्रमा लामो समयदेखि भारतीय सेना बस्दै आएको छ । नेपालीले आफ्नै भू–भाग कालापानीमा पाइला टेक्न समेत पाउँदैनन् । 

पढ्नुहोस्, यो पनि :
कालापानी नजिकबाट जनप्रतिनिधिको दु:खेसो : सीमा स्तम्भ गायब, नेपाली भूमिमै पुग्न भारतीय पास !

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्