प्रतिनिधि सभाको बैठकमा मंगलवार ऊर्जा, जलस्रोत तथा सिँचाइ मन्त्री वर्षमान पुनसँग सांसदहरूले प्रश्नोत्तरको कार्यक्रम राखिएको थियो ।

नेमकिपा सांसद प्रेम सुवालले राखेको सिँचाइसम्बन्धी प्रश्नको मन्त्रीले जवाफ दिएपछि नेपाली कांग्रेसकी सांसद रंगमति शाहीले पुरक प्रश्न सोधिन्– हुम्लामा गएको सिँचाइको बजेट तपाईंका कार्यकर्ताको खल्तीमा गएको छ, जमिनमा सिँचाइ पुगिरहेको छैन । मार्सी फलाउन सकिएको छैन । किसानहरू ५ किलो चामलका लागि खाद्य संस्थानको गोदाममा लाइन लागेका छन् । मार्सी फलाउनका लागि के छ योजना, जान्न चाहन्छु ।

सांसद शाहीको प्रश्नमा मन्त्री पुनले यसरी दिए जवाफ :

गत वर्ष पहाडमा १ हजार हेक्टरभन्दा माथिको आयोजना मात्र केन्द्रको कमाण्डमा सञ्चालन गर्ने भन्ने थियो । यो वर्षदेखि १ सय हेक्टरको समेत गर्न सक्नेगरी कार्यविधि निर्माण भएको छ । केही प्रस्ताव हुम्लाबाट सिफारिश भएर आएका छन्, यस वर्ष सर्भे गर्ने र अर्कोवर्ष कार्यान्वयनमा जानेगरी काम हुन्छ । जहाँसम्म मार्सी धान फलाउने कुरा छ, मार्सी फलाउने मन्त्रालय अलग्गै छ, हामीले सिँचाइ पुर्‍याउने मात्र हो ।