पाकिस्तानको कराँचीमा आइतवार विषालु ग्यास चुहिँदा अहिलेसम्म १४ जनाको मृत्यु भएको छ र सयौंजना बिरामी भएका छन् । अधिकारीहरूले ग्यास कहाँबाट चुहिएको हो भनी पत्ता लगाउन सकेका छैनन् । 

समस्याको जड पत्ता लगाउन अधिकारीहरूले कोशिश गरिरहँदा विषालु ग्यास अझै चुहिँदै गरेकोमा चिन्ता व्यक्त गरिएको छ । 

सिन्ध प्रान्तको स्वास्थ्य विभागका डा जफर मेहदीले विषालु ग्यासका कारण १४ जनाको मृत्यु भएको र ५०० जना बिरामी परेको जानकारी दिए । बिरामीमध्ये केहीलाई आईसीयूमा राखेर उपचार गरिँदैछ । 

मृतकहरूको शवपरीक्षण गरिएको र पोस्टमोर्टमको प्रतिवेदन ७२ घन्टामा आइसक्ने जानकारी पनि उनले दिए । 

प्रदर्शनकारीहरूले फेस्क मास्क लगाएर अधिकारीहरूलाई ग्यास चुहिएको विषयमा उत्तर दिन भन्दै कराँचीमा विरोध प्रदर्शन समेत गरेका छन् । 

कराँचीका अधिकारीहरूले ग्यास चुहिएको कुनै प्रमाण फेला नपरेको बताएका छन् ।

द गार्डियनबाट