आगामी साता भारत भ्रमणमा आउन लागेका अमेरिकाका राष्ट्रपति डोनल्ड ट्रम्पले भारतसँग व्यापार सम्बन्धका विषयमा असन्तुष्टि प्रकट गरेका छन् ।

पत्रकारहरूसँग कुरा गर्दै उनले भने, ‘भारतले हामीसँग राम्रो व्यवहार गर्ने गरेको छैन । तर म प्रधानमन्त्री नरेन्द्र मोदीलाई एकदमै मन पराउँछु ।’

भारतसँग ठूलो व्यापार सम्झौता भविष्यमा हुन सक्ने उनले बताए । नोभेम्बर महिनामा हुन लागेको राष्ट्रपति निर्वाचनअगावै भारतसँग सम्झौता होला कि नहोला आफूलाई थाहा नभएको उनको भनाइ छ । 

उनले भने, ‘हामीहरू भारतसँग व्यापार सम्झौता गर्न सक्छौं । तर म यस ठूलो सम्झौतालाई भविष्यका लागि सुरक्षित गर्छु । तर नोभेम्बर महिनामा हुने चुनावअघि सम्झौता हुन्छ कि हुँदैन त थाहा छैन तर हामी भारतसँग ठूलै सम्झौता गर्नेछौं ।’

समाचार संस्था पीटीआईले ट्रम्पको भारत भ्रमणका क्रममा भारत र अमेरिकाले एक ट्रेड प्याकेजमा हस्ताक्षर गर्न सक्ने समाचार दिएको छ । 

आफू भारत भ्रमणका लागि उत्साहित रहेको पनि उनले बताए । ‘मलाई प्रधानमन्त्री मोदी मन पर्छन् । उनले मलाई एयरपोर्ट र कार्यक्रमस्थलको बीचमा ७० लाख मानिस आउने बताएका छन् । अनि अहिले बनिरहेको स्टेडियम संसारकै सबभन्दा ठूलो हो जस्तो लाग्छ ।’

ट्रम्प फागुन १२ र १३ गते भारत भ्रमण गर्दैछन् ।