जापानमा आदिवासीहरूलाई ओलम्पिक उद्घाटन समारोहमा सहभागी हुन नदिइने

जापानले आफ्ना आदिवासीहरूको अधिकारप्रति प्रतिबद्धता जनाएको भए पनि टोक्योमा हुन लागेको ग्रीष्मकालीन ओलम्पिक आयोजकहरूले आइनु आदिवासी समुदायको एक प्रस्तुति रोकेका छन् । ओलम्पिकको ओपनिङ सेरेमोनीमा उनीहरूले प्रस्तुति दिने कार्यक्रम थियो । 

आइनु समुदायका मानिस जापानको सबभन्दा उत्तरमा रहेको होक्काइदो टापुका मूल निवासी हुन् र उनीहरूले आफ्नो संस्कृति ओलम्पिक स्टेडियममा देखाउन पाउने आशा गरेका थिए । तर केही दिनअघि मात्र उनीहरूलाई नाच्न नदिइने भनियो । 


Advertisement

बन्दोबस्तीका समस्याका कारण आदिवासीहरूको प्रस्तुतिलाई हटाइएको ओलम्पिक आयोजक कमिटीले जनाएको छ । 

सरकारी टीभी एनएचकेले अघिल्लो साता आइनु सेरेमोनियम नृत्य टोक्यो राष्ट्रिय संग्रहालयको सांस्कृतिक प्रदर्शनमा देखाइने भने पनि आइनु प्रतिनिधिहरूले त्यसभन्दा ठूलो मञ्चमा प्रस्तुति दिन पाइने आशा गरेका थिए । 


Advertisement

‘हामी सबैजना ओलम्पिक स्टेडियममा प्रस्तुति दिने आशा गरिरहेका थियौं,’ आइनु एसोसिएसन अफ होक्काइदोका काजुआकी काइजावाले बताए । तीन वर्षअघि नै ओलम्पिक आयोजकहरूसँग ओपनिङ सेरेमोनीमा आइनुको प्रस्तुति समावेश गरिने चर्चा गरिएको उनले बताए । 

‘हामीहरू आयोजकहरूसँग आइनु संस्कृति ओलम्पिकमा कसरी प्रतिनिधित्व गराउन सकिन्छ भन्ने विषयमा कुरा गर्नेछौं,’ काइजावाले बताए । आयोजक कमिटीले आफ्नो निर्णयको उचित व्याख्या गर्नुपर्ने उनको भनाइ छ । 

जापान सरकारले हालैका दिनमा आइनु समुदायको हैसियत सुधार्न कदम चालेकोमा यस्तो निर्णय आएको छ । गत वर्षको मे महिनामा संसद्ले एक कानून पारित गरेर आइनुलाई जापानको आदिवासी समुदायका रूपमा वैध पहिचान दिएको थियो । त्यसपछि उनीहरूको सांस्कृतिक पहिचानको संरक्षण गर्ने दायित्व सरकारमा आइपुगेको छ र उनीहरूमाथि रोजगारी, शिक्षा तथा अन्य क्षेत्रमा भेदभाव गर्न प्रतिबन्ध लगाइएको छ । 

सन् २०१७ मा गरिएको सर्वेक्षणमा होक्काइदोमा लगभग १३ हजार आइनु रहेको देखाउँछ तर वास्तविक संख्या निकै माथि रहेको विश्वास गरिएको छ । 

द गार्डियनबाट

एजेन्सी
एजेन्सी

लेखकबाट थप...

कमेन्ट गर्नुहोस्