लगातार उकालो लागेको धितोपत्र बजारमा शेयर कारोबार नेप्से परिसूचकले नयाँ इतिहास कायम गरेको छ ।

साताभर बजारले उकालो यात्रा अर्थात् ‘बुलिस टे«न्ड’ पछ्यायो । बजार उकालो लागेर डेड वर्ष पहिलेको भन्दा माथिको अवस्थामा पुगेको छ ।

लगानीकर्तामा एक प्रकारको विश्वाससमेत पैदा भएको छ । यसले बजारमा नयाँ लगानीकर्तासमेत थपिएका छन् । 

नेपाल स्टक एक्सचेन्जका अनुसार साताभर कूल १८१ कम्पनीको ८ अर्ब ६९ करोड ८९ लाख ६५ हजार ४७४ मूल्य बराबरका कूल २ करोड ५३ लाख ३३ हजार ५५९ कित्ता शेयर कारोबार भए । बजार ओरालो लागेर न्यून विन्दुमा आइपुगेको नेप्सेको उकालो यात्रासँगै कारोबारमा देखिएको यो सुधार पछिल्ला दिनको सबैभन्दा बढी हो । 

साताको पहिलो दिन नेप्से परिसूचक झण्डै २० अंकले बढ्यो । सो दिन विभिन्न ४ कम्पनीका शेयरमा सकारात्मक ‘सर्किट’ समेत लागेको थियो । त्यसदिन नेप्सेमा १९.३९ ले वृद्धि भई १ हजार ३६३.९७ मा पुगेको थियो । कूल १७६ कम्पनीका ४१ लाख ५ हजार १३४ कित्ता शेयर १ अर्ब ९७ करोड ८१ लाख ८ हजार ७०१ बराबरको कारोबार भए । 

सोमवार नेप्से परिसूचक ३४ अंकले बढ्यो । लगातार उकालो लागेको बजारमा त्यस दिन नेप्सेले नयाँ इतिहास कायम गरेको थियो । नेपाल स्टक एक्सचेन्जका अनुसार नेप्सेमा ३४.२४ विन्दुले बढेर १ हजार ३९८.२४ मा पुग्यो । झण्डै २ अर्ब ७० करोड जतिको कारोबार भयो । कूल १७५ कम्पनीका ६४ लाख ७४ हजार ७५० कित्ता शेयर २ अर्ब ६८ करोड ७५ लाख ३३ हजार ४४२ मूल्यमा खरिद–बिक्री भए । 

मंगलवार नेप्सेमा १.७७ ले वृद्धि भई १ हजार ४००.०१ मा पुग्यो । लामो समयपछि नेप्सेले १ हजार ४०० माथि पुगेको हो । नेप्सेमा झिनो सुधार देखिए पनि कारोबार रकम भने २ अर्बमाथि पुगेको छ । कूल १८१ कम्पनीका ५४ लाख ६८ हजार ४८३ कित्ता शेयर २ अर्ब १२ करोड ५९ लाख ७७ हजार ३४ बराबरको कारोबार भयो ।

बुधबार नेप्सेमा ५.२४ विन्दुले सुधार आई १ हजार ४०५.२५ मा पुग्यो । त्यसदिन कूल १७७ कम्पनीको ३४ लाख ५५ हजार ६८२ कित्ता शेयर १ अर्ब ६२ करोड ८८ लाख ४१ हजार ३८९ मूल्यमा खरिद–बिक्री भए । बिहीवार नेप्से परिसूचक उच्च अंकले वृद्धि भयो । लगातार उकालो लागिरहेको बजारले नयाँ उचाइ कायम गर्‍यो । त्यसदिन नेप्सेमा २९.३२ अंकले बढेर १ हजार ४३४.५७ मा पुग्यो । कूल १८० कम्पनीका ५८ लाख २९ हजार ५१० कित्ता शेयर २ अर्ब ७८ करोड ५० लाख ४ हजार ९०८ मूल्यमा खरिद–बिक्री भए ।