कम्बोडियामा अघिल्लो साता ९८ वर्षकी बन सेनले आफ्नी १०१ वर्षीया दिदी बन चिया र ९२ वर्षीय भाइलाई भेटेकी छन् । 

भेटघाटमा दुवै दिदीबहिनीको आँखामा आँसु थियो । उनीहरूको भेट ४७ वर्षपछि भएको थियो । बीचमा खमेर रुजको शासन चलेपछि उनीहरूलाई एकअर्काको कुनै खबर भएन ।

उनीहरू लामो समय छुट्टिँदा एकको मृत्यु भएको अनुमान गरिएको थियो । अन्तिमपटक उनीहरूले एकअर्कालाई सन् १९७३ मा देखभेट गरेका थिए । 

बन दिदीबहिनीलाई भेटघाट गराउन स्थानीय गैरसरकारी संस्था चिल्ड्रन्स फन्डले सन् २००४ मा पहल गरेको थियो । तर लामो प्रक्रियापछि बल्ल अघिल्लो साता एक उनीहरूबीचको भेटघाट सम्भव भयो । 

पोल पोटको शासनमा बन सेनले पति गुमाइन् । अनि बाँच्नका लागि उनले लामो समयसम्म फोहर उठाउने काम गरिन् । अनि छिमेकीहरूका बालबच्चाको हेरचाह पनि गर्न थालिन् । 

बन चियाका पतिलाई पनि खमेर रुजले मारेको थियो । उनी १२ बालबालिकाका साथ बसिरहेकी थिइन् । उनलाई बहिनी मरिसकेको जस्तो लागेको थियो । उनले भनिन्, ‘हाम्रो १३ नातेदारलाई पोल पोटले मारे । बन सेनलाई पनि मारिएको हुन सक्ने जस्तो हामीलाई लाग्यो ।’