समाजवादी पार्टीका संघीय परिषद् अध्यक्ष एवं पूर्वप्रधानमन्त्री डा. बाबुराम भट्टराईले मातातीर्थको करीब १ सय ७३ रोपनी जग्गा मोहीलाई दिने भनी आफू नेतृत्वको मन्त्रिपरिषद्को निर्णयमा प्रधानमन्त्री केपी शर्मा ओलीले प्रतिशोधपूर्ण अभिव्यक्ति दिएको आरोप लगाएका छन् । 

बुधवार बसेको प्रतिनिधि सभा बैठकमा सभामुखसँग समय लिएर भट्टराईले मातातीर्थको जग्गा आफ्नो मन्त्रिपरिषद्ले कुनै भूमाफियालाई नभई गरीब जोताहा किसानलाई दिएको बताएका हुन् । फागुन ३ गते संसद्लाई सम्बोधन गर्ने क्रममा ओलीले मातातीर्थको जग्गा छानबिन गरेर फिर्ता ल्याउने बताएका थिए । 

‘म हिजो मात्र त्यसक्षेत्रमा गएर आए, प्रधानमन्त्रीको अभिव्यक्तिपछि छाप्रोमा बसेको गरीबहरू सुतेका छैनन्, विद्यार्थीहरू स्कूल जान सकेका छैनन्,’ भट्टराईले भने ।

आफू प्रधानमन्त्री रहेको समयमा तत्कालीन मन्त्री पोष्टबहादुर बोगटी संयोजकत्वमा रहेको कानून समितिले गरेको सिफारिशका आधारमा सरकारले गरीबहरूलाई जग्गा दिने निर्णय गरेको भन्दै भट्टराईले त्यसको नैतिक जिम्मेवारी लिने बताए । २०६९ साल कात्तिक १४ गते सो निर्णय भएको थियो । 

‘प्रधानमन्त्रीले संसद्मा बोलेको कुरा प्रतिशोध हो कि, असहिष्णुता हो कि निषेध गर्ने प्रवृत्ति हो बुझ्न सकिएन,’ उनले भने ।