दिल्लीमा साम्प्रदायिक हिंसामा पनि देखियो मानवता, पीडितलाई दिइयो शरण

दिल्लीमा हिन्दू मुसलमानबीच घृणा फैलाएर हिंसा मच्चाइएको भए पनि धार्मिक एकताका केही उदाहरणहरू प्रस्तुत भएका छन् । 

उत्तरपूर्वी दिल्लीको अशोकनगरमा लगभग ४० मुसलमानका लागि हिन्दू छिमेकीहरू सहारा बनेका छन् । मंगलवार भीडले मुसलमानको घर जलाइदिएपछि ज्यान बचाएर भागेका मानिसका लागि हिन्दूहरूले घरको ढोका खोलेर शरण दिए । 


Advertisement

त्यसदिन अपराह्नमा लगभग एक हजार मानिसको भीड ठूलो मस्जिद नजिकको कोलोनीमा पस्यो । केही मानिस मस्जिद पसे । त्यहाँ २० जना प्रार्थना गरेर बसिरहेका थिए । 

भीडले मस्जिदमा तोडफोड गर्‍यो । स्थानीय मोहम्मद तैयबले दिउँसो लगभग डेढ बजे केही मानिस मस्जिदमाथि बढेको र भगवा झण्डाका साथै भारतको राष्ट्रिय झण्डा फर्फराएको बताए । स्थानीयहरूले बुधवार बिहान त्यो झण्डा हटाए । स्थानीयहरूले हुलदंगा गर्नेलाई कुनै हानि नगराउन अपील गरे तर कसैले सुनेन । ती सबै बाहिरबाट आएका मानिस थिए । 


Advertisement

अशोकनगरका निवासी राजेश खत्रीले भने, ‘धेरैजसो दंगाबाजहरूले आफ्नो अनुहार ढाकेका थिए र उनीहरूको हातमा फलामे छड थिए । उनीहरूले पसल जलाउन थाले । उनीहरूले हामीलाई मार्लाने भनेर हामी डरायौं ।’

पसल जलाएपछि उनीहरू ६ वटा घरतिर गए । मोहम्मद राशिदले भने, ‘यस कोलोनीमा ६ वटा घर मुसलमानको छ । दंगाबाजहरूलाई यो कुरा थाहा भएरै होला, अरू घरमा उनीहरूले क्षति पुर्‍याएनन् । तर हामी मुसलमानको घरको सबै कुरा उनीहरूले लुटे । हामी बेघर भएका छौं ।’

‘हामीहरू सडकमा बस्नुपर्ने भए पनि हाम्रा छिमेकी हिन्दूहरूले हाम्रो सहायता गरे । उनीहरूले हामीलाई पूरा साथ दिए र घरमा आश्रय दिए । हामीहरू यहाँ २५ वर्षदेखि बसिरहेका छौं र कहिले पनि कुनै हिन्दू छिमेकीसँग झगडा परेन । हामीहरू परिवार जस्तो गरी मिलेर बसेका छौं ।’

मुसलमान परिवारलाई सहारा दिने पिन्टुले भने, ‘जे सुकै होस्, हामीहरू उनीहरूलाई साथ दिन्छौं । हामी पनि हिन्दू हौं तर उनीहरूको सम्पत्ति नाश गर्ने कुरा सोच्न पनि सक्दैनौं । हाम्रो घरमा अहिले बसिरहेको परिवारको पसलमा आगो लगाइएकाले उनीहरूले गुजारा चलाउनै मुश्किल परेको छ । संकटको क्षणमा हामी उनीहरूलाई बेसहारा छोड्न सक्दैनौं ।’

एजेन्सी
एजेन्सी

लेखकबाट थप...

कमेन्ट गर्नुहोस्