कैलालीका कांग्रेस नेता राजसमझ चौधरी काठ व्यवसायी र वनकर्मचारीलाई निर्घात कुटपिट गरेको गरेकाे आरोपमा पक्राउ परेका छन्।

जिल्ला प्रहरी कार्यालय कैलालीका प्रहरी निरीक्षक प्रकाश कार्कीका अनुसार काठ व्यवसायी मीनबहादुर घर्तीमगर र वनरक्षक बासु जैशीलाई कुटपिट गरेको आरोपमा नेता राजसमझसँगै स्थानीय देवसमझ चौधरी पनि पक्राउ परेका हुन्। नेता चौधरी कैलारी गाउँपालिकाका अध्यक्षमा चुनाव लडेका थिए।

जिल्ला प्रशासन कार्यालय कैलालीबाट ५ दिनको लागि म्याद थपपछि थप अनुसन्धान थालिएको प्रहरी निरिक्षक कार्कीले जानकारी दिए।

प्रहरीका अनुसार काठ व्यवसायी घर्तिमगर बिहीबार कैलाली जिल्लाको कैलारी गाउँपालिका वडा ६ स्थित सालमाछा सामुदायिक वन उपभोक्ता समूहले टेण्डर आह्वान गरेपछि ५ ट्रकमा काठ लोड गरी धनगढी ल्याउने क्रममा भित्तरिया गाउँमा कुटपिट भएको हो।

भित्तरियाका स्थानीय समेत रहेका चौधरीसहितको समूहले काठ तस्करी गरिरहेको भन्दै आफूहरुमाथि एक्कासी आक्रमण गरी निर्घात कुटपिट गरेको व्यवसायी घर्तिमगरले बताए। व्यवसायी घर्तिमगरले आफूले सामुदायिक वन उपभोक्ता समूहले टेण्डर आहवान गरेको र समिता ट्रेडर्स एण्ड सप्लायर्सको नाममा टेण्डर सदर भएपछि सबै कानुनी प्रक्रिया पूरा गरी काठ लोड गरी धनगढी ल्याउँदै गर्दा आफूहरुलाई तस्करीको आरोप लगाई कुटपिट गरेको जनाए। सबै कागजात देखाउँदा समेत नमानेको उनको भनाइ छ।

उनले भने, ‘एक महिना अघि टेण्डर सदर भएको थियो । त्यसपछि समूहलाई रोयलटी र राजश्व बुझाएर विहिबार पौने ६ बजे दरपीट भई सील भएपछि सामुदायिक वन उपभोक्ता समूहले चलानी दिएको थियो। काठ ल्याउने क्रममा भित्तरियामा राति भयो। रातीराती तस्करी गरेको आरोप लगाउँदै कुटपिट गरे । ट्रकको चाबी खोसे। प्रहरीलाई खबर भएपछि बल्ल ज्यान जोगियो ।’ कुटपिटबाट दुबै जनाको टाउकोमा चोट लागेको छ।

व्यवसायी घर्तीमगरले आफूसँग रहेको ३ लाख ५५ हजार नगद, भिभो कम्पनीको एउटा माेबाइल र एक थान साधारण मोबाइल गायब भएको बताएका छन्। राजसमझ चौधरी र देवसमझ चौधरीविरुद्ध व्यवसायी घर्तिमगरले जिल्ला प्रहरी कार्यालय कैलालीमा कुटपिट र चोरी आरोपमा मुद्दा दर्ता गरेका छन्।