कर्मचारीको ट्रेड युनियन अधिकार र पाउँदै आएको सेवासुविधा कटौती नगरी ऐन जारी गर्न माग गर्दै सत्तारुढ नेकपा निकट नेपाल निजामती कर्मचारी संगठनले जागरण आन्दोलनको प्रारम्भ गरेको छ । 

फागुन १७ गते शनिवार ७ वटै प्रदेश र उपत्यकामा एकसाथ जागरण आन्दोलनको शुरूवात गरिएको संगठनका अध्यक्ष केदारप्रसाद देवकोटाले बताए ।

‘भ्रष्ट्राचार नियन्त्रण गर्नुपर्ने, सुशासन कायम गर्नुपर्ने, संघीय र प्रदेश निजामती ऐन तत्काल जारी गर्नुपर्ने, स्थानीय तह सेवा ऐन तत्काल जारी गर्नुपर्ने र ३ वटै तहमा ट्रेड युनियन हकअधिकार कायम हुनुपर्ने मागसहित संगठनले जागरण आन्दोलन प्रारम्भ गरेको छ,’ अध्यक्ष देवकोटाले लोकान्तरसँग भने, ‘हामीसहित आधिकारिक ट्रेड युनियन र अन्य संगठनले संयुक्त रुपमा संघीय मामिला तथा सामान्य प्रशासन मन्त्री, राज्य व्यवस्था तथा सुशासन समिति र मुख्य सचिवलाई हाम्रा मागहरू पहिल्यैदेखि राखेका छौं ।’

पास भइसक्नुपर्ने संघीय निजामती ऐन अब छिट्टै पास हुने अवस्था रहेको सन्दर्भमा आफ्ना मागहरू सम्बोधन गरिने/नगरिनेमा आफूहरू चनाखो रहेको देवकोटाले बताए ।

तत्काल सशक्त आन्दोलनका कार्यक्रम घोषणा नगरिएको बताउँदै संगठनका अध्यक्ष देवकोटाले भने, ‘जारी हुन लागेको ऐनमा हाम्रो ट्रेड युनियन अधिकार कटौती हुने र हामीले पाउँदै आएका सेवासुविधा कटौती हुने स्थिति आएमा आन्दोलनको लागि तयार रहन तथा कर्मचारीलाई सचेत हुन आह्वान गर्दै जागरण आन्दोलको शुरूवात गरेका हौं ।’ कर्मचारीका माग सम्बोधन नभए आन्दोलनको कार्र्यक्रम पनि घोषणा हुन सक्ने देवकोटाले बताए ।

संसदको सुशासन तथा राज्य व्यवस्था समितिमा संघीय निजामती ऐन २०७६ माथि अन्तिम छलफल भइरहेको छ । संगठनको जागरण आन्दोलनले संसदको समितिमा दबाब परोस् भन्ने उद्देश्य रहेको संगठनका अध्यक्ष देवकोटाले बताए । नेपाल निजामती कर्मचारी संगठन पूर्व एमाले निकट नेकपाको संगठन हो ।