नेपाल कम्युनिस्ट पार्टी (नेकपा) बागमती प्रदेशले आगामी चैतदेखि तीन महिने अभियान सञ्चालन गर्ने भएको छ।

कमिटीको काठमाडौँमा भएको चौथौ बैठकले  चैत १ गतेदेखि ०७७ जेठ मसान्तसम्म पार्टी एकता सुदृढीकरण तथा जनसम्बन्ध विस्तार अभियान सञ्चालन गर्ने निर्णय गरेको हो। यसबाट पार्टीको गतिविधि स्थानीय तहसम्म सञ्चालन हुने नेकपाका प्रदेश सचिव आनन्दप्रसाद पोखरेलले जानकारी दिए।

 अभियान तयारीका लागि फागुन २२ देखि चैत ४ गतेसम्म प्रदेशका सबै जिल्लामा अभियानसम्बन्धी अभिमुखीकरण प्रशिक्षण भेला र बैठक राखी जिल्ला र पालिकास्तरीय कार्ययोजना बनाउने निर्णयसमेत भएको छ।
यस तीनमहिने अभियानमा दुईपटक प्रदेश सचिवालयको बैठक बस्नेछ र असार ५ गते प्रदेश सङ्गठन कमिटीको पूर्ण बैठक बस्ने निर्णयसमेत गरेको छ।
 
अभियान अवधिमा पर्ने शहीद सप्ताह फागुन १४ देखि २१ लाई अभियानको अङ्गको रुपमा मनाउने निर्णयसमेत गरेको छ। प्रदेश कमिटीले प्रदेशअन्तर्गत ३० विभाग गठन गरी ती विभागका प्रमुख–उपप्रमुखलगायतलाई आगामी चैत २० गतेभित्र तोक्नेसमेत निर्णय गरेको छ।

सबै विभागका प्रमुख, उपप्रमुखले चैत्र २० गतेभित्र विभागको बैठक राखी अभियानलाई सहयोग पुग्ने गरी कार्यक्रम तयार गरी कार्यान्वयन गर्नुपर्ने निर्णय गरेको छ।