नेपाल उद्योग वाणिज्य महासंघको आसन्न निर्वाचनमा वरिष्ठ उपाध्यक्षको उम्मेदवारी घोषणा गरेका व्यवसायी चन्द्र ढकालले तीन तहका सरकार र उद्योगी व्यवसायीको बीचमा पुलको काम गर्नको लागि आफूले नेतृत्व दाबी गरेको बताएका छन् ।

उद्योग वाणिज्य संघ बागलुङको ५६ औं साधारण सभामा मंगलवार आयोजित कार्यक्रममा ढकालले सरकारले निजी क्षेत्रसँग सरोकार राख्ने कानूनको निर्माण गर्दा सम्बन्धित पक्षको राय लिनुपर्ने बताए ।

संघले यस वर्ष वाणिज्य संकायतर्फ उत्कृष्ट (१०९४) अंक ल्याउने धौलागिरि बहुमुखी क्याम्पसकी कमला विकलाई नगद ५ हजार रुपैयाँसहित दोसल्ला ओढाएर सम्मान गरेको छ ।

उत्कृष्ट व्यवसायीतर्फ यस वर्ष शिवशंकर शाह, छविलाल पौडेल, रघुनाथ राजभण्डारी र सुजन लामिछानेलाई संघले सम्मान गरेको हो । 

साधारण सभाको अवसरमा संघ र कालिका भगवती गुठीले अतिविपन्न विद्यार्थीले अध्ययन गर्ने बानपा–१२ अमलाचौरमा रहेको जगन्नाथ प्राविलाई शैक्षिक सामग्री, पोशाक र झोला सहयोग गरेका छन् । विद्यालयमा २८ विद्यार्थी अध्ययनरत छन् ।

संघका कोषाध्यक्ष श्रीजय श्रेष्ठले झोला, कालिका भगवती गुठीले शैक्षिक सामग्री र संघले पोशाक खरिदका लागि १५ हजार रुपैयाँ नगद प्रदान गरेको थियो ।