मुलुकी अपराधसंहिता लागू भएसँगै जिल्लामा चेक अनादार तथा बैंकिङ कसुरका घटना बढेको छ । 

जिल्ला प्रहरी कार्यालय चितवनको ३ वर्षीय तथ्यांक हेर्ने हो भने यो मुद्दा दर्ता हुने क्रम बढ्दो संख्यामा छ । 

प्रहरीको तथ्यांक अनुसार चालू आव २०७६/७७ को माघसम्म बैंकिङ कसुर शीर्षकमा ६३ वटा मुद्दा दर्ता भएका छन् । आव २०७५/७६ भदौबाट शुरू भएको यो संहिताका कारण बैंकिङ  कसूरमा मुद्दाहरू दर्ता हुने क्रम बढेको हो ।

संहिता लागू भएको वर्ष बैंकिङमा ६२ वटा मुद्दा दर्ता भएको कार्यालयले जनाएको छ । 

आव ०७४/७५ मा बैंकिङ कसुरसम्बन्धी एउटा मात्रै मुद्दा दर्ता भएको थियो । जिल्ला प्रहरी कार्यालय चितवनका प्रवक्ता प्रहरी नायब उपरीक्षक एकनारायण कोइरालाले बढ्दो आर्थिक कारोवारसँगै बैंकिङ कसुरका मुद्दाहरु बढ्दै गएको बताए ।

पैसा दिनका लागि चेक दिने तर खातामा पैसा नहुने समस्याले नागरिक पीडित हुँदै गइरहेको उनको भनाइ थियो । 

जिल्लामा बैंकिङ कसुरसम्बन्धी मुद्दा बढ्दै गएको भएपनि यसका लागि जिल्ला अदालतमा बेन्च नहुँदा समस्या आएको उनले बताए ।