प्रतिनिधि सभाको बुधवारको बैठकले ‘राष्ट्रिय खेलकुद विकास विधेयक २०७६’ पारित गरेको छ ।

युवा तथा खेलकूदमन्त्री जगतबहादुर सुनार विश्वकर्माले सो विधेयक प्रस्तुत गरेका थिए ।

बैठकले ‘कारागार विधेयक २०७६’ माथि विचार गरियोस् भन्ने प्रस्तावलाई स्वीकृत गरेको छ । 

विधेयकलाई सर्वसम्मतिले स्वीकृत गरेको हो । फागुन १९ गते सोमवार सभामुख अग्निप्रसाद सापकोटाले विधेयक प्रस्तुत गर्न लाग्दा गणपूरक संख्या नपुगेपछि स्थगित गरिएको थियो ।

नेपाली कांग्रेसका सांसद पार्वती डिसी चौधरीले गणपूरक संख्या नपुगेको भन्दै नियमापत्ति गर्नु भएपनि निर्णयार्थ पेश हुन सकेको थिएन । 

बुधवारको बैठकले ‘पशु स्वास्थ्य तथा पशु सेवा परिषद् विधेयक २०७६’ माथि विचार गरियोस् भन्ने प्रस्ताव स्वीकृत गरेको छ । कृषि तथा पशुपन्छी विकासमन्त्री घनश्याम भुसालले प्रस्तुत गरेको सो प्रस्तावलाई सर्वसम्मतिले स्वीकृत गरेको हो । 

बैठकले ‘नेपाल इञ्जिनीयरिङ परिषद् (पहिलो संशोधन) विधेयक २०७६’ लाई दफावार छलफलका लागि सम्बन्धित समितिमा पठाइयोस् भन्ने प्रस्तावलाई सर्वसम्मतिले स्वीकृत गरेको छ ।

भौतिक पूर्वाधार तथा यातायात व्यवस्थामन्त्री वसन्तकुमार नेम्वाङले सो प्रस्ताव प्रस्तुत गरेका थिए । सो विधेयक राष्ट्रियसभामा उत्पत्ति भएको हो ।