ब्राजिलका फूटबल लेजेन्ड रोनाल्डिन्होलाई फर्जी कागजात बोकेर पाराग्वे प्रवेश गर्न खाजेको आरोपमा पक्राउ गरिएको छ । 

यी ३९ वर्षीय पूर्वखेलाडी सन् २००२ मा विश्वकप जित्ने ब्राजिली टोलीमा थिए । उनलाई भाइ रोबर्टोसँग बुधवार राति रिजोर्ट याट यान्ड गल्फ क्लब पाराग्वेओमा पक्राउ गरिएको पाराग्वेको गृह मन्त्रालयले जनाएको छ । 

ला नासियोन पत्रिकाका अनुसार, होटलमा रोनाल्डिन्हो र रोबर्टोको नाममा पाराग्वेको पासपोर्ट भेटिएको थियो । 

पाराग्वे प्रहरीको आधिकारिक बयानमा रोनाल्डिन्हो र उनीसँगको टोलीलाई क्यासिनो मालिक नेल्सन बेलोत्तीले बोलाएको उल्लेख छ । 

उनले प्रशंसक र गण्यमान्य व्यक्तित्वहरूसँग विभिन्न कार्यक्रममा भाग लिने अपेक्षा गरिएको थियो । 

अहिले रोनाल्डिन्होको ब्राजिली पासपोर्ट रद्द गरिएको छ । 

बार्सिलोना क्लबका पूर्वखेलाडी र उनका भाइलाई यसअघि अनुमति नलिइकन लेक गुआइबामा माछा मार्ने जाली राखेकोमा दोषी ठहर गरिएको थियो । त्यतिखेर उनीहरूलाई ८५ लाख डलर बराबरको जरिवाना लगाइएको र देश छोडेर जान प्रतिबन्ध समेत लगाइएको थियो ।