त्रिवि शिक्षण अस्पतालमा मिर्गौला पुनः प्रत्यारोपणपछि स्वास्थ्यलाभ गरिरहेका प्रधानमन्त्री केपी शर्मा ओलीलाई उनकी धर्मपत्नी राधिका शाक्यले भेटेकी छिन् ।

गत बुधवार प्रत्यारोपणको शल्यक्रिया गरेपछि मिर्गौला दाता समीक्षा संग्रौलाले बाहेक प्रधानमन्त्री ओलीलाई बाहिरका कसैले भेट्न पाएका थिएनन् । उपचारमा संलग्न चिकित्सकहरूले प्रधानमन्त्री पत्नी शाक्यलाई पनि भेट्न दिएका थिएनन् ।

बिहीवार शाक्यले प्रधानमन्त्री ओलीलाई भेटेको जानकारी प्रधानमन्त्रीका मुख्य सल्लाहकार विष्णु रिमालले सामाजिक सञ्जाल ट्वीटरमार्फत सार्वजनिक गरेका छन् ।

'प्रधानमन्त्रीज्यूको स्वास्थ्यमा निरन्तर प्रगति । दोश्रो भिजिटरको रुपमा प्रथम महिला राधिका शाक्यले भेट्नु भयो,' रिमालले ट्वीटरमा लेखेका छन् ।