होली पर्वको अवसरमा अत्यधिक मदिरा सेवन गर्दा धनुषामा ५ जनाको ज्यान गएको छ ।

धनुषाको क्षिरेश्वरनाथ नगरपालिका–२ रमदैयामा ५ जनाको ज्यान गएको हो । 

जिल्ला प्रहरी कार्यालय धनुषाका प्रहरी उपरीक्षक रमेशकुमार बस्नेतले होलीको अवसरमा अत्यधिक मदिरा सेवन गरेकामध्ये बुधवार ३ जना र बिहीवार २ जना गरी ५ जनाको मृत्यु भएको बताए ।

धनुषाको रमदैयास्थित जानकी शिक्षण अस्पतालमा उपचार गराउने बेलामा उनीहरूको मृत्यु भएको हो । प्रहरीका अनुसार ज्यान जानेमा स्थानीय ब्रह्मदेव यादव, विभाद मण्डल, गुदरी महरा, रामनारायण महरा र राजु महरा छन् ।

मृत्युको कारण मदिरा हो वा होइन भन्ने थप पुष्टिका लागि मृतकको शव प्रादेशिक अस्पताल जनकपुरमा ल्याइएको प्रहरीले जनाएको छ ।

बिरामी भएका थप २ जनाको रमदैयास्थित जानकी शिक्षण अस्पतालमा उपचार भइरहेको छ ।