प्रदेश नम्बर २ को नाम मिथिला भोजपुरा राख्ने नेपाली कांग्रेसको प्रस्ताव पनि प्रदेश सभाबाट अस्वीकृत भएको छ । 

प्रदेश सभामा मंगलवार भएको मतदानमा कांग्रेसको प्रस्तावमा २८ मत परेको थियो ।

नेपाली कांग्रेसका सांसद नरेशकुमार यादवले राखेको प्रस्ताव निर्णयार्थ पेश गर्दा मात्र २८ मत परेको प्रदेश सभाका सभामुख सरोज यादवले घोषणा गरे । 

प्रदेश सभामा कांग्रेसका १९ सांसद मात्र छन् । 

यसअघि जानकी प्रदेश राख्ने नेकपाको प्रस्ताव पनि असफल भएको थियो । नेकपाको प्रस्तावको पक्षमा ३७ मत परेको थियो ।

राजधानी र नाम तोक्न प्रदेश सभाको दुईतिहाइ अर्थात ७२ मत आवश्यक छ । प्रदेश सभामा १ सय ७ जना सांसद छन् ।

सत्तारुढ समाजवादी पार्टी र राजपासँग बहुमत भएपनि आवश्यक दुईतिहाइ छैन । समाजवादी र राजपाले प्रदेशको नाम मधेश राख्न प्रस्ताव गरेका छन् ।