कोरोनाका कारण अत्यावश्यकबाहेकका सेवा बन्द भएको पहिलो दिन सिंहदरबारमा जे देखियो

नारायण अर्याल
नारायण अर्याल

पत्रकार अर्याल लोकान्तरका लागि समसामयिक घटनाक्रम र प्रशासनिक मामिलामा रिपोर्टिङ गर्छन् ।

अत्यावश्यकबाहेक सबै सेवा बन्द भएपनि सिंहदरबारका सरकारी कार्यालयहरू भने खुला छन्, यद्यपि सेवाग्राही भने छैनन् ।

प्रधानमन्त्री ओलीले देशवासीका नाममा सम्बोधन गर्दै चैत ९ (आज)देखि चैत २१ गतेसम्म अत्यावश्यकबाहेक सबै सेवा बन्द गर्ने घोषणा गरेका थिए ।


Advertisement

सम्बोधनका क्रममा प्रधानमन्त्री ओलीले कर्मचारीहरूले कार्यालयमा उपस्थित भएर सहयोग गर्ने अपेक्षसमेत गरेका थिए ।

सेवाग्राहीका लागि कार्यालय बन्द भएपनि कर्मचारीहरू भने उपस्थित भएका छन् । 


Advertisement

सिंहदरबारको दक्षिणी गेटमा ज्वरोमापनका लागि स्वास्थ्यकर्मी
कर्मचारी नै सेवाग्राही हुने संघीय मामिला तथा सामान्य प्रशासन मन्त्रालयमा भने केही सेवाग्राही उपस्थित भएको मन्त्रालयका संगठन विकास महाशाखा प्रमुख सहसचिव यामप्रसाद भुसाल बताउँछन् ।

‘यो शाखामा सेवा लिने कर्मचारी नै हुन्, आज पनि ८/१० जना सेवाग्राहीलाई सेवा गरें, तर यो संख्या विगतको तुलनामा नगण्य हो,’ सहसचिव भुसालले लोकान्तरसँग भने ।

आफूहरू सरकारको निर्णयबमोजिम जुनसुकै समयमा पनि काम गर्न तयार रहेको र छुट्टि नभएपनि गुनासो नरहेको सहसचिव भुसालले बताए ।

यता उद्योग, वाणिज्य तथा आपूर्ति मन्त्रालयका प्रवक्ता प्रकाश दाहालले मन्त्रालयसँग सेवाग्राही प्रत्यक्ष नहुने भएकाले नियमित कामहरू भइरहेको बताए । 

‘हामीले नीतिगत तहको काम गर्ने भएकाले काममा कुनै कमी भएको छैन, सिंहदरबारभित्र कर्मचारी उपस्थित हुने, अत्यावश्यक सेवा प्रवाह गर्ने, यो अवस्थामा कार्यालयका आन्तरिक सुधारका काम गर्ने र सरकारले खटाएको अवस्थामा जुनसुकै अवस्थामा काममा काममा खटिने निर्देशन भएको छ,’ प्रवक्ता दाहालले भने । 

सहसचिवदेखि माथिका कर्मचारीले बिदा पनि नलिएर चौबिसै घण्टा तयार भएर बस्ने निर्देशन भएको प्रवक्ता दाहालले बताए ।

भूमि व्यवस्था, गरीबी निवारण तथा सहकारी मन्त्रालय प्रशासन महाशाखाका उपसचिव टोलराज उपाध्यायले आफ्नो मन्त्रालय सेवाग्राहीको प्रत्यक्ष काम गर्ने कार्यालय नभएकाले आन्तरिक काम भइरहेको बताए ।

‘आन्तरिक रूपमा हुने कामहरू भइरहेका छन्, सेवाग्राही आउन बन्द गरिएतापनि हाम्रो कामको नियमितता रोकिएको छैन,’ उपसचिव उपाध्ययले लोकान्तरसँग भने ।

अनिवार्य ज्वरो मापन


सिंहदरबार परिसरभित्र प्रवेश गर्दा अनिवार्य ज्वरो नाप्नुपर्ने व्यवस्था गरिएको छ । 

स्वास्थ्य सेवा विभागले आजबाट सिंहदरबार परिसरभित्र प्रवेश गर्ने कर्मचारी र सेवाग्राहीलाई ज्वरो नापेर मात्रै प्रवेश गर्ने व्यवस्था गरेको डीएसपी राकेश सिंहले जानकारी दिए ।

सिंहका अनुसार सिंहदरबारमा प्रवेश गर्ने व्याक्तिलाई १ सय दशमलव ४ डिग्री फरेनहाइटभन्दा बढी ज्वरो आएको भेटिएमा स्वास्थ्य सेवा केन्द्रमा पठाउने निर्देशन भएको छ ।

नारायण अर्याल
नारायण अर्याल

लेखकबाट थप...

कमेन्ट गर्नुहोस्