नेपालसहित संसारका धेरै देश कोरोना भाइरस संक्रमणको शिकार बनिरहेका छन् ।

कोरोनाबाट बच्न नेपाल सरकार, प्रदेश सरकार र स्थानीय सरकारहरूले सतर्कता र सावधानीका उपाय अपनाइरहँदा २ नम्बर प्रदेश सरकार भने छुट्टै धन्दामा लागेको छ ।

‘काम कुरो एकातिर, कुम्लो बोकी ठिमीतिर’ भनेझैं प्रदेश सरकारका मुख्यमन्त्रीदेखि सभामुखसम्म गत आर्थिक वर्षका योजनाको रकम भुक्तानीका लागि संघीय राजधानी काठमाडौंमा दौडधूप गरिरहेका छन् ।

मुख्यमन्त्री लालबाबु राउत, सभामुख सरोजकुमार यादव, भौतिक पूर्वाधार विकास मन्त्री जितेन्द्र सोनलसहित विभिन्न मन्त्रालयका मन्त्री, प्रतिपक्षी दल नेकपाका संसदीय दलका नेता सत्यनारायण मण्डल, नेपाली कांग्रेस संसदीय दलका नेता रामसरोज यादव सहितको डेलिगेसन टोली काठमाडौंमा छ ।

‘आर्थिक मामिला तथा योजना मन्त्रीबाहेक सबै मन्त्री सहितको डेलिगेसन टोलीसहित हामी अहिले काठमाडौंमा छौं,’ नेकपा संसदीय दलका नेता सत्यनारायण मण्डलले लोकान्तरसँग भने, ‘म त शनिवार काठमाडौं आएँ तर मुख्यमन्त्रीज्यू शुक्रवार नै काठमाडौं आइपुग्नुभयो ।’

गत आर्थिक वर्षमा उपभोक्ता समितिबाट सम्पन्न भएका योजनाको ८२ करोड रुपैयाँ भुक्तानी नभएको अवस्थामा मुख्यसचिव तथा सचिवले भुक्तानी दिन आनाकानी गरिरहेका कारण भुक्तानीको प्रबन्ध मिलाउनका लागि अर्थमन्त्री डा. युवराज खतिवडासँग भेट गरेको उनले बताए । 

कर्मचारीहरू आफूखुशी काजमा गइदिने, बिदामा बसिदिने, सचिव सरुवा भएर आएपनि मन्त्रालयमा हाजिर नहुने तथा मुख्यसचिवले समेत मनपरी गर्ने गरेको गुनासोबारे समेत संघीय मामिला तथा सामान्य प्रशासन मन्त्री हृदयेश त्रिपाठीसँग भेट गरेको सामजिक विकास मन्त्री नबल किशोर साह सुडीले बताए । 

कोरोना भाइरसको रोकथाम तथा नियन्त्रणका लागि गठित उच्चस्तरीय समितिका संयोजक उपप्रधान तथा रक्षामन्त्री ईश्वर पोखरेलसँग समेत भेट गरेको मन्त्री सुडीले बताए ।

कोरोना रोकथामको पूर्व तयारीका लागि धेरै कुराको व्यवस्थापन गर्ने जिम्मेवारी आफ्नो मन्त्रालयको भएकाले आइतवार साँझ आफू जनकपुर फर्किएपनि मुख्यमन्त्रीसहित अन्य मन्त्री तथा टोली भने नफर्किएको उनले बताए ।

नेकपा संसदीय दलका नेता मण्डलले आफू आइतवार नै टोलीबाट छुट्टिएकाले मुख्यमन्त्री के गरिरहेका छन् भन्नेबारे जानकारी नभएको बताए । प्रदेशका जनता कोरोना संक्रमणको चिन्ताले आतंकित भएको बेला मुख्यमन्त्रीले पुरानो भुक्तानीको चिन्तामा काठमाडौं लागेको भन्दै प्रदेशका नागरिक अगुवाले आपत्ति जनाएका छन् ।