कोरोना भाइरस (कोभिड १९)का कारण विश्वभर ज्यान गुमाउनेको संख्या १६ हजार ५ सय नाघेको छ ।

म‌गलवार विहानको ७ बजेसम्मको  तत्थ्याङ्क अनुसार कुल १ सय ९५ देशमा फैलिएको कोरोनाका कारण १६ हजार ५ सय १० जनाले ज्यान गुमाएका छन् । पछिल्लो समय युरोपेली मुलुकमा व्यापक रुपमा फैलिरहेको कोभिड —१९ ले इटलीमा मात्रै ६ हजार ७७ जनाको ज्यान लिएको छ।

यो संख्या कोरोनाको संक्रमण शुरु भएको ठानिएको देश चिनको भन्दा झण्डै दोब्बर हो । त्यहाँ वितेको २४ घण्टामा मात्रै थप ६ सय १ जनाको ज्यान गएको छ । वितेको २४ घण्टामा थप ४ हजार ७ सय ८९ जना नयाँ संक्रमित थपिएपछि त्यहाँ  संक्रमितको संख्या  ६३ हजार ९ सय २७ पुगेको छ । ७ हजार ४ सय ३२ जना निको भएर घर फर्किएका छन् भने ३ हजार २ सय ४ जनाको अवस्था गम्भिर छ।

इटली पछि, वितेको २४ घण्टामा स्पेनमा कोरोना भाइरस कोभिड नाइन्टिनका कारण सबैभन्दा धेरै ५ सय ३९ जनाले ज्यान गुमाएका छन् । यो संगै त्यहाँ मृतकको संख्या २ हजार ३ सय ११ पुगेको छ । हालसम्म ३५ हजार १ सय ३६ जनामा कोरोना संक्रमित भएकोमा वितेको २४ घण्टामा मात्रै ६ हजार ३ सय ६८ विरामी थपिएका छन् । 

त्यस्तै फ्रान्समा पनि मृतकको संख्या अत्यधिक बढेको छ । त्यहाँ थप १ सय ८६ जनाले कोभिड नाइन्टिनका कारण ज्यान गुमाएसंगै मृतकको संख्या ८ सय ६० पुगेको छ । १९ हजार ८ सय ५६ संक्रमित छन् । 

त्यस्तै मध्य पुर्वमा इरानमा सबैभन्दा धेरै थप १ सय २७ जनाको कोभिड १९ का कारण ज्यान गएसंगै मृतकको संख्या १८ सय १२ पुगेको छ । त्यहाँ कुल संक्रमितको संख्या २३ हजार ४९ पुग्दा १४ सय ११ नयाँ विरामी हुन । 

त्यस्तै अमेरिकामा पनि संक्रमितको संख्या बढ्दै गएको छ । वितेको २४ घण्टामा त्यहाँ थप १ सय ३६ जनाको कोभिडका कारण ज्यान गएको छ । यो संगै ज्यान गुमाउनेको संख्या ५ सय ४९ पुगेको छ । कुल ४३ हजार ७ सय १८ संक्रमित छन् ।