जिम्बाब्वेमा ३० वर्षीय एक टेलिभिजन पत्रकारको कोरोनाभाइरसको संक्रमणपछि मृत्यु भएको छ । भाइरसका कारण दिवंगत हुने उनी जिम्बाब्वेमा पहिलो व्यक्ति हुन् । 

शनिवार दुईजनामा कोरोनाभाइरस देखिएकोमा जोरोरो माकाम्बा पनि एक थिए । 

उनलाई राजधानी हरारेमा रहेको एक अस्पतालमा बिहीवार भर्ना गरिएको थियो । उनलाई रुघाखोकीको लक्षण देखिएपछि भर्ना गरिएको स्वास्थ्य मन्त्रालयले एक बयान जारी गरेर बतायो । 

माकाम्बा न्युयोर्कमा हुँदा रोग लागेको थियो । उनलाई हरारेको विल्किन्स अस्पतालमा आइसोलेसनमा राखिएको थियो । 

माकाम्बाका एक साथीले उनलाई मायास्थेनिया ग्राभिस नामक दुर्लभ रोग लागेको र उनले पोहोर साल छातीको ट्युमर हटाउनका लागि शल्यक्रिया गराएको बताए । 

माकाम्बा विद्यालयमा हुँदा निकै धेरै पुरस्कार र ट्रफी जित्ने गरेको उनका साथी भिमबाइ मुथिनहिरीले बताए । 

माकाम्बा फेब्रुअरी २९ मा न्युयोर्क गएका थिए र मार्च ९ मा हरारे फर्केका थिए । 

फर्केको तीन दिनपछि उनमा रुघाको लक्षण देखियो । एक हप्तापछि उनले चिकित्सकसँग सम्पर्क गर्दा उनलाई सेल्फ आइसोलेसनमा जान भनिएको स्वास्थ्यमन्त्री ओबादियाह मोयोले बताइन् । 

सोमवार राति राष्ट्रका नाममा सम्बोधन गर्दै जिम्बाब्वेका राष्ट्रपति इम्मर्सन मनाङवाले देश फर्किने जिम्बाब्वेली बाहेक अन्य सबैका लागि सीमानाका बन्द गरिएको बताए ।