रोबर्टो टोनेलीले आगामी सेप्टेम्बर महिनामा हुने विवाहको तयारी गरिरहेको बेलामा उत्तरी इटलीको मोडेना शहरमा कोरोनाभाइरस फैलियो । त्यसपछि उनी आफ्नी प्रेमिका इभाना कास्तानिएरका साथ कोरोनाविरुद्धको लडाइँमा होमिएका छन् । 

‘हामीहरू पहिलोपटक अस्पतालमा भेटेका हौं,’ ३१ वर्षीय टोनेलीले आफ्नो शिफ्ट सकिएपछि टाइम पत्रिकालाई बताए । ‘उनी मेरी हाकिम थिइन् ।’

अहिले उनीहरू एउटै अस्पतालमा पल्मनोलोजिस्टका रूपमा सँगै काम गरिरहेका छन् । हप्ताको ६ दिन कम्तीमा दिनको १४ घन्टा उनीहरू काममा खटिएका छन् । 

हप्तौं बित्दै जाँदा इटलीमा चिकित्सक र नर्सहरू भाइरस फैलिनबाट रोक्नका लागि अहोरात्र खटिएका छन् । इटलीमा चार हजारभन्दा बढी चिकित्सक र नर्सहरूमा संक्रमण देखिएको छ जुन देशभरिकै केसमध्ये ८ प्रतिशत जति भएको इटालियन नेसनल इन्स्टिच्युट अफ हेल्थले जनाएको छ । 

कोरोनाविरुद्धको अग्रपंक्तिमा रहेका धेरैजसोहरू प्रेमीप्रेमिका छन् । 

‘सबभन्दा झ्याउ भनेको त तपाईंले प्रेम गर्ने मान्छेले तपाईंले देख्नुपरेको कुरा नदेखोस् भन्ने चाहना हो,’ टोनेली भन्छन्, ‘तर म मास्क हटाएपछि तत्कालै उनको अनुहार हेर्न पाउँछु ।’

इटलीका साना शहरहरूमा चिकित्सकहरू मात्र सम्बन्धी हैनन् । आईसीयूमा आउने रोगीहरू पनि एकै परिवारका छन् । 

‘मोडेनामा हाम्रा पहिला रोगीहरू दाजुभाइ थिए,’ कास्तानिएरले भनिन् । 

केही दिनअघि उनीहरूले १३ वर्षीया बालिकालाई अस्पतालमा भर्ना गरे । त्यसको केही दिनपछि उनका पितालाई आईसीयू ल्याइयो । 

टोनेलीका बिरामीहरू प्रियजनसँग कुराकानी गर्न फोन आफैंसित राख्छन् । उनीहरू समाचार पढ्छन् र मृत्युदर देख्छन् । ‘उनीहरू मलाई सोध्छन्, म मर्छु होला ?’ टोनेली भन्छन् । ‘म आफना बिरामीहरूसँग कहिल्यै झूट बोल्दिनँ । म उनीहरूलाई भन्छु– हामीहरूले यो लडाइँ सँगै लड्नुपर्छ ।’

टोनेली र उनकी प्रेमिकाको दुई वर्षीया छोरी पनि छ । छोरी अहिले हजुरबा हजुरआमासँग बसिरहेकी छ । उनीहरूले छोरीलाई नदेखेको एक महिनाभन्दा बढी भइसक्यो । 

‘ऊ ठूली भएपछि हामीलाई नायक ठान्छे होला,’ कास्तानिएरले भनिन्, ‘उसले हाम्रो बाध्यता बुझ्छे होली ।’