कोरोनाभाइरस रोक्नका लागि विश्व स्वास्थ्य संगठनले संसारभरिका देशलाई मेगाट्रायल अर्थात् महापरीक्षण गर्न आह्वान गरेको छ । 

महापरीक्षण शुरू समेत भइसकेको छ । यसका लागि विश्व स्वास्थ्य संगठनले चार सबभन्दा प्रभावकारी औषधिको परीक्षण शुरू गर्न भनेको छ । तिनै औषधिले कोरोनाको संक्रमणलाई केही हदसम्म रोकिरहेका छन् ।

ती चार औषधिका साथै संसारभरिका चिकित्सकहरूले दुई अन्य औषधिमा पनि ध्यान दिइरहेका छन् । ती दुई औषधि सार्स र मर्स महामारी फैलिँदाखेरी बनाइएको थियो । तर ती औषधिहरूलाई वैश्विक स्तरमा मान्यता दिइएको थिएन । 

तीमध्ये पहिलो औषधि हो रेमडेसिभिर । यसलाई जिलीड सायन्सेजले इबोलाको उपचारका लागि बनाएको थियो । रेमडेसिभिरले कुनै पनि भाइरसको आरएनएलाई फुटाइदिन्छ । त्यसले गर्दा भाइरस मानव शरीरमा पसेर नयाँ भाइरस उत्पन्न गर्न सक्दैन । 

अमेरिकाको पहिलो कोरोनाभाइरस पीडितलाई रेमडेसिभिर औषधि दिइएको थियो । त्यो रोगी ठीक पनि भएको थियो । त्यसको रिपोर्ट द न्यु इंग्ल्यान्ड जर्नल अफ मेडिसिनमा प्रकाशित भएको थियो । 

अर्को औषधि हो क्लोरोकिन । अमेरिकाका राष्ट्रपति डोनल्ड ट्रम्पले यसको पैरवी समेत गरेका थिए । तर विश्व स्वास्थ्य संगठनको वैज्ञानिक कमिटीले यस औषधिलाई खारेज गरिदिएको थियो । 

मार्च १३ मा जेनभामा भएको वैज्ञानिक कमिटीको बैठकमा क्लोरोकिन र हाइड्रोक्सीक्लोरोकिनलाई महापरीक्षणका लागि पठाउने कुरा उठेको थियो किनकि यस औषधिको वैश्विक स्तरमा माग आएको थियो । 

नाइजेरियामा यो औषधि लिँदा मानिसहरूलाई उल्टो असर गरेर अस्पताल भर्ना गर्नुपरेको खबर पनि छ । अनि माछाहरूको एक्वेरियममा प्रयोग हुने क्लोरोकिन खाएर अमेरिकामा एकजना बिरामी परेको पनि खबर छ । तर यसको उचित प्रयोग गर्न नजानेका परिणाम हुन् यी ।

क्लोरोकिन र हाइड्रोक्सीक्लोरोकिनले मानव शरीरको कोशिकाको भित्री भागलाई सिध्याइदिन्छ । त्यही भित्री भागमा भाइरसले आक्रमण गर्ने हो । यसले कोरोनाभाइरसको बाहिरी सतहमा उपस्थित प्रोटीनलाई बेकामे तुल्याएर भाइरसलाई कमजोर बनाउँछ । 

तेस्रो औषधि हो रिटोनाभिर र लोपिनाभिर । यिनीहरूलाई कालेट्रा पनि भनिन्छ । सन् २००० मा यसको उपयोग एचआईभी रोक्नका लागि गरिएको थियो । यो औषधि शरीरमा एकदमै छिटो घुल्छ । 

हलुका संक्रमण भएमा रिटोनाभिर उपयोग गरिन्छ । बढी संक्रमण भएमा लोपिनाभिर उपयोग हुन्छ । यी औषधिहरू शरीरमा भाइरसको आक्रमण भएका स्थानमा गएर भाइरस र मानव कोशिकाको सम्बन्धलाई तोडिदिन्छन् । 

यस औषधिको कोरोनाभाइरसमा परीक्षण चीनको वुहानमै गरिएको थियो । केही रोगीहरूमा यसको सकारात्मक असर देखियो भने केहीमा देखिएन । यसको रिपोर्ट मार्च १५ मा द न्यु इंग्ल्यान्ड जर्नल अफ मेडिसिनमा प्रकाशित भएको थियो । 

चौथो औषधि चाहिँ रिटोनाभिर/लोपिनाभिर र इन्टरफेरोन–बिटाको मिश्रण हो । यसको उपयोग मर्स महामारीबाट संक्रमित रोगीहरूमा गरिएको थियो । यसले शरीरको टिस्युलाई क्षति गर्छ तर भाइरसको प्रभाव पनि अन्त्य गरिदिन्छ ।