चीनको वुहानबाट कोरोनाभाइरस फैलिएको हो र त्यहाँबाट जम्मा १३ सय ८२ किलोमिटरको दूरीमा दक्षिण कोरिया पर्छ । 

दक्षिण कोरियाले बुद्धिमत्तापूर्ण उपाय अपनाएर कोरोनाभाइरसविरुद्धको लडाइँ जितेको छ । उसलाई अहिले संसारभरिका लागि मोडल मानिएको छ । 

दक्षिण कोरियामा ९ हजार १३७ वटा संक्रमण भेटिएका छन् भने ३५ सयभन्दा बढी मानिस ठीक भइसकेका छन् । १२६ जनाको मृत्यु भएको छ भने जम्मा ५९ जना गम्भीर बिरामी छन् । 

त्यत्तिका मानिसमा संक्रमण हुँदा पनि न बन्दाबन्दी (लकडाउन) गरियो न अन्य कठोर उपाय अपनाइयो । 

दक्षिण कोरियाका परराष्ट्रमन्त्री काङ युङ वाले छिटो परीक्षण र राम्रो उपचार गरेका कारण कोरोनाभाइरसबाट मृत्यु हुनेको संख्या कम भएको बताए । आफूहरूले ६०० भन्दा बढी परीक्षण केन्द्र खोलेको र ५० भन्दा बढी ड्राइभिङ स्टेसनमा स्क्रीनिङ गरेको बताए । 

मानिसहरूको तापक्रम र गलामा भएको समस्या जाँच्न जम्मा १० मिनेट लागेको उनले बताए । एक घन्टाभित्र रिपोर्ट आउने व्यवस्था मिलाएको अनि पारदर्शी फोन बूथलाई परीक्षण केन्द्र बनाएको जानकारी पनि उनले दिए । 

देशभरि संक्रमण जाँच्नका लागि ठूला भवन, होटल, पार्किङ लट र सार्वजनिक स्थानहरूमा थर्मल इमेजिङ क्यामरा लगाइयो । ज्वरो आएको मानिसको तत्काल पहिचान गर्न यसबाट सहज भयो । 

होटल र रेस्टुराँमा पनि ज्वरो नापेपछि मात्र ग्राहकलाई भित्र पस्न अनुमति दिइएको थियो । अनि विशेषज्ञहरूले संक्रमणबाट बच्नका लागि मानिसहरूलाई हात कसरी चलाउने भनेर समेत सिकाए । 

यो नयाँ तरिका थियो । दाहिने हाते मानिसलाई मोबाइल चलाउँदा, ढोकाको ह्यान्डल समात्दा र अन्य सानाठूला काम गर्दा देब्रे हात प्रयोग गर्न सल्लाह दिइयो । 

अनि देब्रे हातेहरूलाई दाहिने हात प्रयोग गर्न भनियो । जुन हातको प्रयोग दैनिक काममा गरिन्छ, त्यही हात अनुहारमा पुग्छ । त्यसैले उल्टो हात प्रयोग गर्दा संक्रमणको खतरा निकै घट्यो ।