स्पेनको राजधानी मड्रिड र बेलायतको राजधानी लन्डनमा कोरोनाभाइरसको संक्रमण ह्वात्तै बढेर गएको छ । तर अमेरिकाको न्युयोर्कमा कोरोनाको मृत्युदर सबैभन्दा अगाडि छ । 

मृत्यु संख्याको नयाँ विश्लेषणमा केही शहरहरूमा औसत मृत्युदर ती शहर रहेका देशमा भन्दा बढी देखिएको छ । 

लन्डनमा दुई दिनको अन्तरमा मृत्युको संख्या दोब्बर भएको छ जुन बेलायतको औसतभन्दा एक दिन बढी हो । फाइनान्सियल टाइम्स पत्रिकाले गरेको अनुसन्धानमा यस्तो देखिएको हो । 

महाव्याधिले मानवतामा पुर्‍याएको क्षति बढ्दो छ । १८ हजारभन्दा बढी मानिसले कोरोनाकै कारण ज्यान गुमाइसकेका छन् । 

इटलीको लोम्बार्डी चीनको वुहानलाई पछि पार्दै सबभन्दा बढी प्रभावित क्षेत्र बनिसकेको छ । मंगलवार मात्र ७४३ जनाको मृत्यु भएको र मर्नेको कुल संख्या ६८ सय २० पुगेको इटली सरकारले जनाएको छ । 

इटलीका अधिकारीहरूले कठोर उपायको प्रभाव बल्ल मात्र देख्न थालिएको र नयाँ संक्रमण जम्मा ८ प्रतिशतले बढेको बताए । 

तर तीव्र गतिमा फैलिरहेको भाइरसले मड्रिड र लन्डन अब कोरोनाको हटस्पट हुन लागेको र त्यहाँ दुई दिनको अन्तरमा मृत्युको संख्या दोब्बर हुन थालेको देखिएको छ । 

बेलायतमा मंगलवार ८७ जनाको मृत्यु भयो । तीमध्ये २१ जना लन्डनमा बिते । एक हप्ताको अन्तरमा बेलायतको मृत्युदर लगभग ६ गुणा बढेको छ । 

उता स्पेनमा सशस्त्र बलहरूले कोरोनाभाइरसविरुद्ध लड्नका लागि नाटोसँग मानवीय सहायताको माग गरेका छन् । त्यहाँ २७ सयभन्दा बढी मानिसको मृत्यु भइसकेको छ । 

युरोप बाहिर अमेरिकामा मृत्युसंख्या बिस्तारै बढिरहेको छ तर न्युयोर्कको मृत्युदर निकै उच्च छ र त्यसले मड्रिडलाई पछि पार्ने देखिएको छ । 

न्युयोर्कमा १२ हजारभन्दा बढी मानिसमा कोरोना देखिएको छ र १२५ जनाको मृत्यु भइसकेको छ । आइतवार रातिदेखि न्युयोर्कमा बन्दाबन्दी (लकडाउन) गरिएको छ ।

स्वास्थ्य अधिकारीहरूले चीनमा भन्दा बढी संक्रमण अमेरिकामा देखिने स्थिति रहेको बताए । अघिल्लो साता मात्रै पनि अमेरिकामा कोरोनाभाइरसका दैनिक केसहरू चीनको भन्दा बढी देखिएका थिए । 

अमेरिकामा कोभिड–१९ को संक्रमण युरोपभन्दा बढी हुने सम्भाव्यता रहेको र यस महाव्याधिको नयाँ केन्द्रविन्दु अमेरिका नै हुने खतरा रहेको विश्व स्वास्थ्य संगठनले चेतावनी दिएको छ । 

पेन्टागनले अमेरिकामा महामारी कैयौं महिनासम्म रहने र जुन वा जुलाई महिनामा मात्र स्थिति सामान्य बन्ने आकलन गरेको बताएको छ ।