प्रदेश पाँचको पश्चिम नवलपरासीमा कोरोना संक्रमण लक्षण देखिएका बिरामीलाई राख्न एक सय शय्याको क्वारेन्टाइन निर्माण गरेको छ । जिल्लाको सुनवा नगरपालिकाको भूमहीस्थित प्रहरी युक्ती तालिम महाविद्यालयको खाली चौरमा क्वारेन्टाइन निर्माण गरिएको हो । क्वारेन्टाइन बुधवारदेखि सञ्चालनमा आएको हो ।

क्वारेन्टाइनमा महाविद्यालयका एक चिकित्सकसहित नगरपालिकाको छुट्टै स्वास्थ्य टीम खटाइएको छ । वार्ड बनाउन महाविद्यालयले त्रिपाल उपलब्ध गराएको छ । त्यसबाहेकका सबै सामग्री नगरपालिकाले उपलब्ध गराएको नगरप्रमुख भीमबहादुर थापाले बताए । ‘बेडदेखि बिरामीलाई आवश्यक पर्ने सम्पूर्ण सामाग्री र खानासमेत नगरपालिकाले व्यवस्था गरेको छ,’ थापाले भने ।

कोरोना संक्रमणको लक्षण देखिएका बिरामीलाई त्यहाँ पुर्‍याएर उपचार गरिने उनले बताए । ‘संक्रमण देखिएका बिरामीलाई तत्काल क्वारेन्टाइनमा पुर्‍याइन्छ । शंका लागेका परिवारका सदस्यलाई पनि त्यहाँ राखेर निगरानीसहित उपचार सुरु गरिने छ,’ थापाले भने ।

स्वास्थ्य संस्थामा रुघाखोकी र ज्वरोका बिरामीको संख्या बढेर उपचारमा समस्या भए उनीहरुलाई पनि क्वारेन्टाइनमा लगेर परीक्षण सुरु गर्ने सोचका साथ वार्ड निर्माण गरिएको थापाले बताए । क्वारेन्टाइनमा अस्थायी शौचालयसमेत निर्माण गरिएको छ ।

क्वारेन्टाइनमा राखेर उपचार गर्ने क्रममा जटिल लक्षण देखिए तत्कालै आइसोलेसनमा पठाइने उनले बताए । हाल जिल्ला अस्पतालमा ५ शैयाको आइसोलेसन छ ।  क्वारेन्टाइनका लागि १० थान पीपीईसहितको सामग्री आइसेको छ । थप ५० थान पीपीई ल्याउन लागिएको र अन्य सहयोगका लागि प्रदेश सरकारसँग माग गरिएको नगर प्रमुख थापाले बताए । क्वारेन्टाइनमा बिरामीलाई ल्याउन र पुर्‍याउनका लागि ३ वटा एम्बुलेन्स तयारी अवस्थामा रहेको नगरपालिकाले जनाएको छ ।

संक्रमणबारे सुरक्षित रहन र लक्षण देखिएका बिरामीहरुको उपचारका लागि जिल्लाका सबै स्थानीय तहहरुलाई क्वारेन्टाइन बनाउन आग्रह गरिएको प्रमुख जिल्ला अधिकारी बासुदेव दाहालले बताए ।