कतारबाट आएका सिराहाका युवालाई प्रदेश सरकारले राख्यो क्वारेन्टाइनमा

अजय अनुरागी
अजय अनुरागी

अजय अनुरागी लोकान्तरका लागि खोज, राजनीति र समसामयिक विषयवस्तुमा कलम चलाउँछन् ।

प्रदेश सरकारले बुधवारदेखि संचालनमा ल्याएको क्वारेन्टाइनमा सिराहाका एक जना युवालाई राखिएको छ । कतारबाट चैत्र ९ गते काठमाडौं अवतरण गरेका सिरहाको मिर्चैयाका ३८ वर्षीय सोमन महरालाई धनुषाको नगराइन नगरपालिकाको गंगुलीस्थित मिथिला आयुर्वेद कलेज तथा अनुसन्धान केन्द्रमा राखिएको छ ।

प्रदेश २ को सामाजिक विकास मन्त्रालय अन्तर्गत रहेको स्वास्थ्य निर्देशनालयका सहनिर्देशक तथा वरिष्ठ जनस्वास्थ्य प्रशासक विजयकुमार झाले उक्त कुराको जानकारी दिएका छन् ।


Advertisement

‘क्वारेन्टाइनमा राखिएको ती युवामा तत्काल कोरोना भाइरस सम्बन्धि कुनै लक्षण देखा परेको छैन,’ झाले लोकान्तरसँग भने, ‘प्रायः शंकास्पद व्यक्तिलाई सुपरीपेक्षण तथा निरीक्षणका लागि १४ दिन सम्म राख्नेछौं । ती युवाको स्वास्थ्य अवस्था ठिकै भएका कारण उनलाई घर पठाएर सेल्फ होम क्वारेन्टाइनमा बस्न भन्ने छौं ।’

उक्त क्वारेन्टाइनमा अहिले २० वटा शय्या तयार पारिएको भए पनि ५० शय्याको तयारी गर्ने काम भइरहेको उनले बताए । ‘केही पारामेडिक्स स्वास्थयकर्मीहरुलाई त्यहाँ परिचालन गरिएको छ, आवश्यक परे चिकित्सकको भिजिट समेत हुने व्यवस्था मिलाएका छौं,’ उनले लोकान्तरसँग भने, ‘१४ दिन भित्रमा कुनै लक्षण देखा परे जानकी मेडिकल कलेजको जनकपुरस्थित सिटी अस्पतालको आइसोलेसन वार्डमा भर्ना गर्ने तयारी गरेका छौं ।’


Advertisement

सामाजिक विकास मन्त्री नवलकिशोर साहको अध्यक्षतामा चैत्र ११ गते बसेको उच्चस्तरीय बैठकबाट धनुषाको उक्त क्वारेन्टाइनसहित वीरगंजको केडिया डेन्टल कलेज, रौतहटको गौरस्थित गौर नर्सिङ इन्स्टिच्युट, गौरकै होटेल सिया प्यालेसमा क्वारेन्टाइन संचालन गर्ने निर्णय गरिएको थियो ।

जनकपुरधामको जानकी मेडिकल कलेजका सिटी अस्पताल तथा विरगंजका नेशनल मेडिकल कलेजलाई कोभिड १९ उपचारका लागि विशेषज्ञ अस्पतालको रुपमा कायम गरिएको थियो । त्यसै गरी प्रदेश भित्रको जिल्ला अस्पतालहरुलाई १० बेडको ट्रान्जिट आइसोलेसन वार्ड तयार गरी संचालनमा ल्याउने निर्णय गरिएको थियो ।

अजय अनुरागी
अजय अनुरागी

लेखकबाट थप...

कमेन्ट गर्नुहोस्