स्पेनी अधिकारीहरूले मानिसहरूलाई घरैमा बसेमा कोरोनाभाइरसको संक्रमण नफैलिने बताए पनि केही मानिसहरू घरबाहिर छन् । उनीहरूको घर भनेकै मड्रिड र बार्सिलोनाका सडक हुन् । 

भाइरसले आक्रान्त पार्ने मुलुकहरूको सूचीमा चौथो स्थानमा रहेको स्पेनमा सरकारले बन्दाबन्दी (लकडाउन) लगाएपछि स्टोरहरू बन्द गरिएका छन्, कार्यालयका भवनहरू खाली छन् र शहरहरू सुनसान छन् । 

‘मानौं कुनै आणविक विस्फोट भएको छ र सबैजना बंकरमा शरण लिइरहेका छन् । हामी जस्ता घर नहुने मात्र बाहिर छौं,’ ३६ वर्षीय गानाले भने । उनी विगत आठ वर्षदेखि सडकमै बसोबास गरिरहेका छन् ।

फर्निचर पसलको ढोकामा कार्डबोर्ड बक्स राखेर उनी एउटा कम्बल ओढेर रात बिताउने गरेका छन् । 

घरबारविहीनहरूका लागि खोलिएका डे सेन्टरहरू कि त बन्द गरिएका छन् कि त तिनको सेवाप्रवाह समय घटाइएको छ । 

‘१२ वर्ष सडकमा सुत्दा मैले सबै कुरा देखिसकेको जस्तो लाग्थ्यो । तर हैन रैछ । यो दिनभरिको मौनताले मलाई तर्साउँछ, भाइरसले भन्दा पनि बढी,’ उनले भने । 

उनी विभिन्न देशका चार अन्य घरबारविहीनहरूसँग लास राम्ब्लासमा रहेको शपिङ आर्केडको एक तल्लामा बस्छन् । बार्सिलोनाको प्रसिद्ध ठाउँ हो त्यो । सुनिएको आवाज प्रहरीको मोटरसाइकलको हो । 

अधिकारीहरूले घरबारविहीन मानिसहरूलाई सडकबाट हटाउन प्रयास गरिरहेका छन् र उनीहरूलाई सामूहिक शिविरमा कोचेका छैनन् किनकि त्यसो गर्दा भाइरसको संक्रमण हुने जोखिम बढ्छ । 

बार्सिलोनामा सडकमै सुत्नेहरूले एउटा कुरामा सहमति जनाए : पैसा वा खानेकुरा माग्नु बेकार हो किनकि अहिले भिक्षा दिनलाई कोही पनि सडकमा हिँडिरहेको छैन ।