अमेरिकाका राष्ट्रपति डोनल्ड ट्रम्प र माथिल्लो सदन सिनेटले १.८ खर्बभन्दा बढीको आर्थिक राहत प्याकेजमा सहमति जनाएका छन् । 

यस प्याकेजमा कोरोनाभाइरस संकटबाट आक्रान्त उद्योगहरूलाई बेलआउट गर्नका लागि दिइने रकम समेत समावेश गरिएको छ । 

रिपब्लिकन सिनेट मेजोरिटी लीडर मिच मक्कोनेलले यो युद्धकालीन समयकै स्तरको लगानी भएको बताए । 

यो सम्झौता भएसँगै अमेरिकाको शेयर बजार उकासियो अनि युरोप र एसियाका शेयरहरू पनि बढे । 

यस सम्झौतामा मानिसहरूले जागिर गुमाएपनि नियमित शुल्क तिर्नका लागि सहायताको व्यवस्था छ । अनि बेरोजगारलाई दिइने सहायतालाई बढाएर २५० अर्ब डलर पुर्‍याइएको छ र साना कम्पनीहरूलाई ३५० अर्ब डलरको आकस्मिक ऋण सहायता दिइनेछ । 

यसले प्रमुख औद्योगिक क्षेत्रहरूलाई स्थिर बनाउने अनि उपकरण नपाएर पिरोलिएका अस्पताल र अन्य स्वास्थ्य संस्थालाई रकम उपलब्ध गराउने मक्कोनेलले बताए । 

‘हामीहरू आजै यो कानून पारित गर्नेछौं,’ उनले थपे । 

सिनेटमा डेमोक्रेटिक पार्टीका नेता चक शुमरले यो प्याकेज अमेरिकी इतिहासकै सबभन्दा ठूलो उद्धार प्याकेज भएको बताए । अस्पतालहरूका लागि यो मार्शल प्लान भएको उनको भनाइ छ । 

मंगलवार राष्ट्रपति ट्रम्पले ईस्टर पर्वसम्ममा अर्थतन्त्र चलायमान बनाउन चाहेको बताएका थिए ।