कोरोनाभाइरसबाट बच्नका लागि तीन पत्र भएको मास्क लगाउन कसैले सुझाव दियो होला अनि कसैले एन९५ मास्क लगाउन भन्यो होला । 

तर कोरोनाभाइरसको खतराका बारेमा थाहा पाएर पनि भारतको बस्तर इलाकाका केही आदिवासीहरूले पातको मास्क बनाएर लगाएका छन् । 

कांकेर जिल्लाको अन्तागढका केही गाउँमा पञ्चायत भवनमा बैठक बोलाउँदा आदिवासीहरू पातबाट बनेको मास्क लगाएर पुगे । 

भर्रीटोला गाउँका एक युवकले बताए, ‘हामीले गाउँमा बाहिरका मानिसलाई पस्न दिएका छैनौं । हामीसँग त मास्क छैन । त्यसैले घरबाट निस्कँदा हामीहरू पातको मास्क लगाइरहेका छौं ।’

आदिवासीहरूले मास्क एक दिन लगाउने अनि त्यसलाई फालेर भोलिपल्ट अर्को मास्क लगाउने गरेका छन् । 

चिकित्सकहरूले यस्ता मास्कले एक हदसम्म त सुरक्षा दिने तर यिनबाट सास फेर्न मुश्किल हुने बताएका छन् । 

रायपुरका डा अभिजीत तिवारीले भने, ‘आदिवासी समाज वर्षौंदेखि आफ्नो परम्परा र ज्ञानले हामीहरूलाई समृद्ध बनाउँदै आएका छन् । उनीहरूको पारम्परिक ज्ञानले जहिले पनि चकित बनाउँछ । तर कोरोना रोक्नलाई उनीहरू पनि अन्य नागरिक जस्तै घरैमा बस्नुपर्छ । सरकारले आदिवासी इलाकामा गएर कपडाबाट बनेको मास्क निःशुल्क बाँड्नुपर्छ । त्यसलाई धोएर बारम्बार उपयोग गर्न मिल्छ ।’

बस्तरका आदिवासीहरूको जीवनमा पातहरूको निकै महत्त्व छ । खाना खानका लागि उनीहरू साल र पलाशका पातको थाली बनाउँछन् अनि रक्सी पिउन महुआका पात उपयोग गर्छन् । 

उनीहरू कपालमा पात राख्छन् र गलामा पातको माला पनि लगाउँछन् । 

उनीहरूको जीविका चलाउन पनि पातहरूको ठूलो भूमिका छ ।