अमेरिकाको लास भेगासमा घरबारविहीन मानिसहरू खाली भएको कार पार्कमा सुत्न बाध्य भएका छन् । उनीहरूलाई आश्रय दिने केन्द्रमा एकजनालाई कोभिड–१९ संक्रमण देखिएपछि सबैलाई हटाइएको थियो । 

क्याथोलिक च्यारिटीले चलाएको घरबारविहीनहरूको आश्रयस्थलमा एक पुरुषलाई अघिल्लो साता भाइरस लागेको भेटिएपछि संक्रमण फैलिने डरले बन्द गरिएको थियो । 

त्यसपछि ५०० भन्दा बढी मानिसहरू सुत्ने ठाउँबाट वञ्चित भए । अनि अधिकारीहरूले क्याशम्यान सेन्टरमा रहेको कार पार्कमा उनीहरूलाई सुत्ने ठाउँ बनाए । 

क्लार्क काउन्टी कमिस्नर जस्टिन जोन्सले एक बयान दिँदै शहरले नयाँ लोकेसन तयार पार्न कडा मेहनत गरेको बताए । 

नयाँ ठाउँ बेलुका ६ बजेदेखि ८ बजेसम्म प्रतिदिन उपलब्ध हुने जोन्सले पुष्टि गरे । क्याथोलिक च्यारिटीको घरबारविहीन आश्रयस्थल पुनः प्रयोगका लागि सुरक्षित नहुन्जेल उनीहरूलाई कार पार्कमै राखिने उनको भनाइ छ । 

तर घरबारविहीनहरू सुत्ने क्षेत्रमा सामाजिक दूरी अपनाउन मिल्ने स्पेस छैन । 

त्यहाँ बस्ने एक व्यक्ति जोनी विंगोले लास भेगास रिभ्यु जर्नललाई बताए, ‘अलिकति कुहिनो सार्दा पनि अर्को मानिससँग ठोकिन पुगिन्छ । तर हामीलाई सुत्नका लागि म्याट दिइएको छ । तर टेन्ट छैन, पानी परेमा के गर्ने ?’
अधिकारीहरूले प्रशंसा गरे पनि अधिकांश घरबारविहीनहरू रातभरि सडकमा कुनै म्याटविनै सुत्न बाध्य भएको द डेली मेलले खबर दियो । 

दी इन्डिपेन्डेन्टबाट