कोरोना भाइरस संक्रमणको जाँच र पहिचानका लागि स्वाबको नमूना परीक्षण गर्ने प्रयोगशालाई महत्त्वपूर्ण मानिन्छ तर २ नम्बर प्रदेशको प्रदेश जनस्वास्थ्य प्रयोगशाला साइन बोर्डमै सीमित भएको छ ।

प्रयोगशालामा सवारीसाधन तथा जनशक्ति पर्याप्त नहुँदा कोरोना भाइरसका शंकास्पद बिरामीको स्वाब संकलनमा समस्या उत्पन्न भएको छ ।

प्रयोगशालाका निर्देशक रामबिनय साहले भने, ‘अहिले विभिन्न ठाउँमा रहेको क्वारेन्टाइनदेखि अस्पतालको आइसोलेसनसम्म स्वाब संकलन गर्न जानुपर्ने हुन्छ तर न त सवारीसाधन छ, न त प्राविधिकसहित अन्य प्रशासनिक जनशक्ति नै ।’

विश्वका विभिन्न देशमा भाइरस संक्रमणको महामारीका बेला प्रदेश सरकारले प्रयोगशालालाई तयारी अवस्थामा राख्न गाडी र केही थप प्राविधिक जनशक्ति उपलब्ध गराउनुपर्ने उनले बताए ।

प्रदेश सरकार मातहत जनकपुरमा प्रादेशिक प्रयोगशालाको कार्यालय स्थापना गरिएको भएपनि प्रयोगशालामा कुनै पनि परीक्षण हुँदैन । साविकमा जिल्ला जनस्वास्थ्य कार्यालय रहेको हालको स्वास्थ्य कार्यालय धनुषाको २ वटा कोठामा प्रयोगशाला कार्यालय खोलिएको छ, साइन बोर्ड झुण्ड्याइएको छ तर कुनै पनि रोगको परीक्षण गरिँदैन । प्रयोगशाला नै बनाइएको छैन ।

‘कात्तिक ४ गते हाम्रो कार्यालय स्थापना भयो तर स्रोतसाधनको अभावमा प्रयोगशाला कक्ष बनाइएको छैन,’ निर्देशक साहले भने, ‘अहिले हामीसँग मातहतको अस्पताल वा स्वास्थ्य संस्थामा नै गएर नमूना संकलन गर्ने विकल्प मात्रै छ ।’ तर आफ्नै निजी सवारीसाधन प्रयोग गर्नुपर्ने बाध्यता रहेको उनले बताए । 

प्रादेशिक प्रयोगशालामा १४ जनाको दरबन्दी छ । त्यसमध्ये ७ जना मात्र कार्यरत छन् । ५ जना प्राविधिक, १ जना लेखापाल र १ जना कार्यालय सहयोगी कार्यरत छन् । कार्यरत ५ जना प्राविधिकमध्ये २ जना प्राविधिक ल्याब टेक्निसियन गुणानन्द साह र रामउदगार यादव प्रादेशिक अस्पताल जनकपुरमा काजमा खटिएका छन् । हाल प्रयोगशालामा जनशक्ति पनि अभाव रहेको उनले बताए ।

कोरोना भाइरस जाँचको नमूना संकलन गर्न राष्ट्रिय जनस्वास्थ्य प्रयोगशालाले प्रादेशिक प्रयोगशालाका २ जना प्राविधिकलाई बोलाएर तालिम दिएको छ । 

सामाजिक विकास मन्त्री नबलकिशोर साह सुडीले मन्त्रालय मातहत सवारीसाधन उपलब्ध नभएका कारण एउटा एम्बुलेन्स र एउटा चारपांग्रे सवारीसाधन तत्काल भाडामा लिएर सञ्चालन गर्न निर्देशन दिइसकेको बताए । जनशक्ति व्यवस्थापनका लागि समेत मातहतको कार्यालयमा पत्राचार गरिसकेको उनले बताए ।