चीनको हाङ्चो शहरमा कोरोनाभाइरस फैलिएका बेलामा  गम्भीर बिरामी भएर अस्पतालमा भर्ना भएका ९० वर्षीय पतिलाई उनकी ८४ वर्षीया पत्नीले दिनको एउटा गरी ४५ वटा प्रेमपत्र पठाएकी छन् । महिलाका प्रेमपत्र अन्लाइनमा आएपछि लाखौं मानिसको मन पग्लेको छ । 

हुआङ ग्वोची नामक ती महिलाले ५५ दिनको अवधिमा ४५ वटा भावुक पत्र लेखेकी थिइन् । अस्पतालमा लकडाउन लगाइएर सबैजनालाई आईसीयू आउनबाट रोकिएपछि हुआङले पत्र लेखेकी हुन् ।

उनका पति सुनलाई कोरोना लागेको त हैन । विगत एक वर्षदेखि उनी श्वासप्रश्वासमा समस्या र मानसिक रोगको उपचारका लागि अस्पतालमा भर्ना गरिएका थिए । 

हजुरआमा हुआङ भनी चिनिने ती महिलालाई पनि श्वासप्रश्वासको रोग छ र उनी पनि त्यही अस्पतालमा भर्ना गरिएकी छन् । उनको अवस्था तुलनात्मक रूपमा कम गम्भीर छ र उनलाई सामान्य वार्डमा राखिएको छ । 

कोरोनाभाइरस संक्रमण फैलिनुअघि उनी पतिलाई भेट्न अस्पताल गइरहन्थिन् । पतिलाई मन पर्ने किवीफ्रुट बोकेर उनी जाने गर्थिन् । 

फेब्रुअरी १ देखि अस्पतालले बाहिरबाट आउने मानिसलाई कडीकडाउ गर्न थालेपनि हुआङ विचलित भइनन् । 

उनी आईसीयू वार्डको ढोकामा कुरिरहन्थिन् र नर्सलाई किवी फलको कचौरा दिएर हजुरबा सुनलाई दिनू है भन्थिन् । 

अनि उनले कागजमा कलमले लेख्दै आफ्ना पतिप्रतिको प्रेम अभिव्यक्त गरिन् र उनलाई मजबूत भई बस्न प्रेरित गरिन् । 

एउटा पत्रमा उनले लेखिन्, ‘प्रिय पति, म ठीक छु । मेरो चिन्ता नलिनू । हाम्रा छोरा र नातिहरू घरैमा छन् । नर्सले दिएको आदेश मान्नू र उनीहरूलाई आफ्नो उपचारमा सहयोग गर्नू ताकि हजुर छिटो निको भएर परिवारसँग पुनर्मिलन गर्न सक्नुहोस् ।’

हजुरबा सुनले पत्नीको पत्र पाएपछि त्यसलाई बारम्बार पढ्ने गरेका थिए । पढिसकेपछि उनी पत्रलाई राम्ररी पट्ट्याउँथे अनि पेटीमुनि सुरक्षित राख्थे ।

चीनको भिडियो पत्रिका पीयरसँग कुरा गर्दै हुआङले भनिन्, ‘मैले परिवारको माया अनुभव गरेकी छु र उनकी पत्नीका रूपमा म उनलाई सहयोग गरिरहन्छु ।’

आठ हप्ताको वियोगपछि हजुरआमा हुआङलाई हजुरबा सुनसँग भेट्न अस्पतालले अनुमति दियो । गत बिहीवार उनीहरूको भेटघाट भएको हो । 

उनी फेस मास्क र सुरक्षा वस्त्र लगाएर रमाउँदै आईसीयूमा दिउँसो ठीक २ बजे पुगेकी थिइन् । उनको हातमा किवी फलको कचौरा थियो ।

सुनको शय्यामा लगिएपछि हुआङले उनलाई नयाँ प्रेमपत्र दिइन् र फेस मास्कबाटै चुम्बन पनि गरिन् । 

‘प्रिय पति, म हजुरलाई भेट्न आएँ । हामीले एकअर्कालाई नदेखेको ५० दिनभन्दा बढी भयो,’ हुआङले भनिन् । अनि उनले पतिको आत्मबल र ‘भुक्के गाला’को प्रशंसा गरिन् ।

स्वास्थ्यकर्मीहरूका अनुसार, पत्नीका प्रेमपत्र पढेर नै सुनले गम्भीर रोग लागेपनि अप्ठ्यारो समय काट्न सकेका हुन् ।