सिद्धार्थ नगरपालिका भैरहवामा गरीब तथा विपन्न परिवारलाई राहत वितरण शुरु भएको छ । लक डाउनको कारण कोही पनि भोकै हुन नपरोस् भन्ने उद्देश्यले गरीब तथा विपन्न मजदुरहरुको लगत संकलन गरी दैनिक उपभोग्य सामग्री राहतस्वरुप वितरण गरिएको छ ।

मंगलवार दिउँसो सिद्धार्थनगर वडा नम्बर १ बाट शुरु भएको राहत वितरण कार्यक्रम नगरको १३ वटै वडामा गरिने नगरपालिकाका अधिकृत यादव प्रसाद सापकोटाले बताए । मंगलवार १ सय ३९ जनाको घरधुरीलाई सिद्धार्थनगर पालिका भैरहवा रुपन्देहीले दैनिक जीवनमा अति आवश्यक खाद्यान्न सामग्री प्रदान गरेको छ ।

सिद्धार्थनगरपालिकाको कार्यपालिका बैठकले चार दिन अगाडी नगरमा रहेका बिहान बेलुका हातमुख जोहो गर्न नसक्ने परिवार तथा ज्यालादारीमा काम गर्ने श्रमिकहरुलाइ राहत दिने निर्णयअनुसार राहत वितरण शुरु भएको नगर प्रमुख हरिप्रसाद अधिकारीले बताए ।

नगर प्रमुख अधिकारीले भने, ‘वडा नम्बर १ बाट मंगलवारखि राहत वितरण शुरु भएको छ । अब नगरको १३ वटै वडामा रहेका १ हजार ८ सय ७२ जना ज्याला मजदुरी गरेर खाने घरधुरीलाई राहत प्रदान गछौं ।’

परिवार संख्याको आधारमा दिइएको उक्त राहत सामग्री चार जनाको परिवार हुने घरधुरीलाइ ५ केजी चामल, दस जनाको सम्म परिवार हुने घरधुरीलाइ १० केजी चामल दिइएको नगर उपप्रमुख उमा काफ्लेले बताइन् ।

काफ्लेका अनुसार हरेक विपन्न परिवारलाई एक लिटर खाने तेल, एक केजी नून, एक केजी दाल पनि प्रदान गरिएको छ । उनले भने ,‘शुरुमा केही कम कम वितरण गरेका छौं । लकडाउन लम्बिदै गयो भने फेरि दिन्छौं । सरकार छ , कोही भोकै बस्न पर्दैन ।’

लक-डाउनको कारण कोही पनि भोकै बस्न नपरोस् भनेर राहत वितरण कार्यक्रम शुरु गरेको नगर प्रमुख अधिकारीले बताए । नगरले कोरोना भाइरस नियन्त्रण राहत कोष स्थापना गरेको छ ।

उक्त कोषमा नगरले यसअघि नै ११ लाख ५१ ह्जार जम्मा गरिसकेको छ भने विभिन्न सहयोगी व्यक्तिहरुले पनि सहयोग गरिरहेका छन् । राहत कोषमा नगरका प्रमुखले २१ ह्जार , उपप्रमुखले १५ हजार र वडाध्यक्षहरुले १० हजारको दरले रकम जम्मा गरेको नगरका प्रमुख प्रशासकीय अधिकृत तुलसीराम मरासीनिले बताए । सिद्धार्थनगरमा १३ वटा वडा रहेका छन् ।