जिप्रका सुर्खेतको लापरवाहीले तीन थुनुवा फरार, विहान सातबजे मात्रै प्रहरीले थाहा पायो

शेरबहादुर थापा
शेरबहादुर थापा

थापा लोकान्तरकालागि कर्णाली प्रदेशका प्रतिनिधि हुन् ।

जिल्ला प्रहरी कार्यालय सुर्खेतकाे थुनुवा कक्षबाट तीन जना कैदी फरार भएका छन् । राती एक बजे नै झ्याल उक्काई फरार भएपनि प्रहरीले भने बिहान ७ बजेमात्रै थाहा पाएको थियो ।

जिल्ला प्रहरी कार्यालय सुर्खेतको पक्की थुनुवा घरको पछाडी पट्टीको झ्याल नै उक्काएर तीन जना ब्राउन सुगर लागु औषध मुद्दामा पक्राउ परेकाहरू आज राती भागेको प्रहरी श्रोतले जानकारी दिएको छ । तीन जना थुनुवाहरू भागेपछि कोरोना विरुद्ध लडिरहेको प्रहरीको ध्यान भंग भएको छ भने जिल्ला प्रहरी कार्यालय भित्र ठूलै हडकम्प मच्चिएको जिल्ला प्रहरी कार्यालय श्रोतको दाबी छ ।


Advertisement

चैत २० गते राती जिल्ला प्रहरी कार्यालय पछाडीतर्फको झ्याल उक्काई फरार हुनेहरू मा दुइ जना चैत १६ गते मात्रै प्रहरीले ब्राउन सुगर लागुऔषधसहित नियन्त्रणमा लिएको थियो । वीरेन्द्रनगर ६ का २६ वर्षीया रोशनराज रेग्मीलाई चैत १६ गते प्रहरीले ४ ग्राम १५० मिलिग्रम लागु औषधसहित पक्राउ गरेको थियो । यस्तै सोही मितिमा  वीनपा ६ कै २० वर्षका सुनिल थारुलाई १२० मिलि ग्राम ब्राउन सुगरसहित पक्राउ गरेको थियो ।

भेरीगंगा नगरपालिका निवासी हाल वीरेन्द्रनगर ११ मा बस्दै आइरहेका २१ वर्षका सन्देश केशरा पनि फरार भएका छन् । २०७६ फागुन २५ गते उनलाई जिल्ला प्रहरी कार्यालय सुर्खेतले ५ ग्राम २०० मिलिग्राम ब्राउन सुगर लागुऔषधसहित पक्राउ गरेको थियो । यी तिनैजना उक्त थुनुवा कक्षबाट फरार भएका हुन्।


Advertisement

जिल्ला प्रहरी कार्यालयका प्रहरी निरीक्षक एवम सूचना अधिकारी गोपाल रायमाझी तथा प्रहरी प्रमुख एसपी दिल्लीराज पन्तलाई यसबारेमा बुझ्न बारम्बार फोन गर्दा पनि उठेन ।

प्रदेश प्रहरी कार्यालय सुर्खेतका प्रहरी नायव उपरीक्षक लोकराज तिमिल्सेनाले तीन जना फरार भएको पुष्टि गरे । उनले थुनुवा कसरी फरार भए, गल्ती कसको हो भन्ने पत्ता लगाउन आजै छानविन समिति समिति गठन गर्ने बताए ।

‘छानविन समितिले सत्यतथ्य बुझेर गल्ती कसबाट भएको हो कारवाहीको लागि सिफारिस गरेपछि हामी माथि पठाउँछौं, माथिबाटै दोषीमाथि कारवाही हुन्छ,’ उनले भने, ‘कार्यालय खुलेपछि कसको नेतृत्वमा समिति गठन गर्ने भन्ने कुरा एसएसपी साबसँग बसेर कुरा हुन्छ । अनुसन्धानकालागि पाँच दिन वा सात दिन कति दिन म्याद दिने भन्ने पनि निर्णय आजै हुन्छ ।’

उनले दोषी जुनसुकै तह र तप्काको भएपनि गल्ती अनुसारको कारवाही हुने दाबी गरे ।

यता, कारवाहीका बारेमा प्रहरी प्रधान कार्यालयका सूचना अधिकारी एवम एसएसपी उमेशराज जोशीसँग सम्पर्क गर्दा उनको फोन उठेन ।
 

शेरबहादुर थापा
शेरबहादुर थापा

लेखकबाट थप...

कमेन्ट गर्नुहोस्