छिमेकी मुलुक चीनको ग्वाङ्जाओबाट मेडिकल सामग्री ल्याउन नेपाल वायुसेवा निगम (नेपाल एयरलाइन्स) को वाइडबडी ए ३३० जहाज त्यसतर्फ प्रस्थान गरेको छ ।

कोरोना भाइरस (कोडिभ–१९) को औषधि तथा उपकरण ल्याउन चार्टर्ड गरिएको सो जहाज ग्वाङजाओ उडेको हो ।

त्रिभुवन अन्तरराष्ट्रिय विमानस्थलबाट बिहान ११ः३० मा उडान भरेको सो जहाज ग्वाङजाओ पुगेर बिहीवारै राति काठमाडौं फर्कने विमानस्थलका महाप्रबन्धक देवेन्द्र केसीले जानकारी दिए ।

यसअघि बुधवार अस्ट्रेलियन र न्यूजील्याण्डका नागरिक बोकेर मलेसिया हुँदै अस्ट्रेलियाको शहर ब्रिशवन पुगेको निगमको अर्को वाइडबडी जहाज पनि बिहीवारै राति फर्कने उडान तालिका रहेको छ ।

यसअघि चैत १६ गते निगमको वाइडबडी जहाजले ग्वाङ्जाओबाट करीब १३ हजार स्वास्थ्य सामग्री ल्याइएको थियो । 

देश लकडाउनको अवस्थामा निगमले विभिन्न मुलुकमा चार्टर्ड तथा कार्गो उडान गरिरहेको छ । चीनका सांघाईलगायत गन्तव्य र श्रीलंकाको कोलम्बो उडानका लागि पनि प्रक्रिया अघि बढेको निगमले उल्लेख गरेको छ ।

मलेसियन जहाजले लग्यो नेदरल्याण्डका नागरिक 

लकडाउनका कारण नेपालमा रोकिएका १२४ जना नेदरल्यान्डका नागरिक घर फर्किएका छन् । उनीहरू बिहीवार बिहान मलेसिया एयरलाइन्सको चार्टर्ड जहाज मार्फत स्वदेश गएका हुन् ।

यसअघि अस्ट्रेलिया, अमेरिका तथा  युरोपका फ्रान्स, जर्मनी लगायत देशले आफ्ना नागरिकलाई जहाज चार्टर्ड गरी सम्बन्धित मुलुक लगेका थिए ।

निगमको वाइडबडीले अस्ट्रेलिया तथा कतार एयरवेजले अन्य मुलुकको चार्टड उडान गरेको थियो । आन्तरिकतर्फ केही हेलिकप्टरको उद्धार उडान र नेपाली सेनाको एक कार्गो उडान हुने विमानस्थलले जनाएको छ ।