उत्तर कोरियाले आफ्नो देशमा एकजना पनि कोभिड १९ बाट संक्रमित नरहेको दाबी गरेको छ । तर दाबीमाथि अन्तर्राष्ट्रिय समुदायले भने सन्देह प्रकट गर्ने गरेका छन् ।

वरिपरीका सबै देशहरूसँगको सीमा बन्द गरेकाले संक्रमण नदेखिएको दाबी उत्तर कोरियाले गरेको हो ।

तर बीबीसीका अनुसार दक्षिण कोरियामा रहेका अमेरिकी सेनाका वरिष्ठ कमाण्डरले उत्तर कोरियाको यो दाबीलाई असम्भव बताएका छन् ।   

हुन त उत्तर कोरियाका एक विशेषज्ञले बीबीसीसँग भनेका छन् कि त्यहाँ संक्रमण रहेको कुरालाई इन्कार गर्न सकिँदैन तर ठूलो स्तरमा फैलिने सम्भावना भने एकदम कम छ ।

जोन्स हप्किन्स विश्वविद्यालयको आंकडाअनुसार अहिले संसारभर दश लाख भन्दा बढी कोरोना संक्रमित भइसकेका छन् भने ५३ हजार भन्दा बढीको मृत्यु भइसकेको छ ।

उत्तर कोरियाका सेन्ट्रल एन्टी एपिडेमिक मुख्यालयका निर्देशक पाक म्योग सूले शुक्रवार समाचार एजेन्सी एएफपीसँग भने, ‘उत्तर कोरियामा अहिलेसम्म एउटा पनि व्यक्तिमा संक्रमण भेटिएको छैन ।’

बीबीसीले एएफपीलाई उदृत गर्दै लेख्छ, ‘उनले भनेका छन् कि - हामीले संक्रमण रोक्नका लागि पहिल्यैदेखि नै सक्रिय र वैज्ञानिक कदम उठाएका छौं । विदेशबाट आउनेहरूलाई हामीले खोजतलाश गरेर क्वारेन्टाइनमा राखेका छौं । हाम्रा सबै स्वास्थ्य सामग्रीहरूलाई निर्मलीकरण गरेका छौं भने जल, स्थल र हवाईमार्ग पूरै बन्द गरेका छौं ।’