कोरोना भाइरसको संक्रमण सम्बन्धि परीक्षण गर्नका लागि प्रदेश २ मा हाल सम्म कुल ७३ जनाको नमुना संकलन गरिएको छ ।

प्रदेश सरकार अन्तर्गत रहेको सामाजिक विकास मन्त्रालयका सचिव डा. राम प्रसाद घिमिरेका अनुसार चैत्र २१ गते सम्ममा कुल ७३ जनाको स्वाब संकलन गरिएकोमा २३ जनाको रिजल्ट नेगेटिभ आएको छ । 

‘प्रदेशका आठ वटै जिल्ला अन्तर्गत रहेका क्वारेन्टाइन तथा आइसोलेसन सेन्टर बाट कुल ७३ जनाको स्वाब संकलन गरिएको छ,’ सचिव घिमिरेले भने, ‘त्यस मध्ये २३ वटा को परिणाम आएको छ, २३ वटै नेगेटिभ पाइएको छ ।’ काठमाडौं स्थित राष्ट्रीय जनस्वास्थ्य प्रयोगशालामा पठाइएको ती सबै परीक्षण मध्ये ५० वटा नमुनाको परिणाम आउन बाँकी नै रहेको उनले बताए ।

प्रदेश २ मा हाल सम्म कुल १ सय २७ वटा क्वारेन्टाइन संचालन गरिएको छ । १२७ क्वारेन्टाइनमा कुल २ हजार ५ सय १ बेड क्षमताको ब्यबस्थापन मिलाइएकोमा अहिले सम्म कुल ७ सय ७१ जना क्वारेन्टाइनमा रहेको घिमिरे बताउँछन् ।

‘त्यसका अतिरिक्त क्वारेन्टाइनमा आएर सम्पर्क गरेर होम क्वारेन्टाइनमा नै बस्ने गरी कुल ९ सय २५ जना घर फर्किएका छन्,’ सचिव घिमिरेले भने, ‘उनीहरुलाई सेल्फ होम क्वारेन्टाइनमा नै बस्न भनिएको छ ।’

प्रदेश २ मा अहिले सम्म कुल ८१ बेड सहितको आइसोलेसन सेन्टर संचालन गरिएकोमा कुल १४ जना मानिस अहिले आइसोलेसन सेन्टरमा भर्ना भएर उपचार गराइरहेको उनले बताए ।

प्रदेश २ मा नै अब कोरोना भाइरस सम्बन्धी परीक्षण गर्नका लागि प्रादेशिक अस्पताल जनकपुरमा संचालनमा आएको प्रादेशिक जनस्वास्थ्य प्रयोगशालामा शुक्रवार कुल ४ जनाको स्वाब संकलन गरेर परीक्षण गरिएको छ । उनीहरुको परीक्षण परिणाम शनिवार २ बजे सम्म आउने उनले बताए ।

प्रदेश भरीमा आइसोलेसन सेन्टर बढाउनका लागि बिभिन्न बिद्यालय, भेन्टिलेटर तथा आइसीयु सहितको व्यस्थापन भएको निजि अस्पतालहरुलाई समेत ब्याक अप प्लानका रुपमा तयारी प्रदेश सरकारले अगाडी बढाएको उनले बताए ।